YESAYA 6 - BALA LUK DO'

Allah Nawar Ni Yesaya Mangun Ku Nabi

¹ Bang lak luk inan Raca' Usia naté idi ui nenier Tuhan. Ieh tudo luun kerusiNeh, idi Ieh medita' idi rayeh, idi teh kuyuh' boyorNeh maput Ruma' Allah ineh.

² Tuda'-tuda' pudut luk mebudung tuped libut-libutNeh. Anid pudut ineh inan anem ilad. Ideh ngebpu kiungdeh ku dueh ilad ineh, idi bururdeh ibpu ku dueh iladdeh! Ideh temulud ku dueh ilad luk baken ineh.

³ Ideh ngitang seburur inan seburur: “Meligan, meligan, meligan! Tuhan luk Melalud ineh meligan! Tana' ini maput ku rayehNeh.”

⁴ Uni tangdeh nengeruyuh tapin Ruma' Allah, idi Ruma' ineh mepanu' ku rabpun.

⁵ Kebalaku, “Ui na inan rapet! Ui miak kumin! Amung bala luk lemaba bibir tangku mesala', idi ui tudo arang aceh pupu luk megéi pebala luk mesala'. Idi nekini dengan matehku sebuleng ui pangeh nenier Raca', ieh ineh Tuhan luk Melalud!”

⁶ Idi sebuleng pudut ineh netemulud amé' matun negku. Ieh nenguit aceh bareh apui luk mulun ratnan bubpun ku apit.

⁷ Ieh nengisit bibir tangku ku bareh apui luk mulun ineh, kebalaneh, “Ini pangeh nepisit luun bibir tangmu, idi babeh sala'mu pangeh netala', idi iko ngalap do' ratnan sala'mu.”

⁸ Idi ui neninger Tuhan pebala, “Idéké luk miak dukenKu? Idéké luk mangun ku gatum Kai?” Kebalaku, “Ui miak amé'. Do' ngecuk negku!”

⁹ Idi Ieh nengecuk negku amé' mada' bala ini nelun mula': “Sagan tu pana' muyuh ninger do'-do', muyuh na miak kali' ilungneh. Sagan tu pana' muyuh nier do'-do' muyuh na miak kali' luk mangun.”

¹⁰ Idi kebalaNeh negku, “Nganau' terawé lemulun ini mebacé, idi laliddeh mebengel, idi matehdeh mebuser, pad ideh na miak nier, ninger, idi kali' ilungneh, pad ideh na lumi Negku idi uen ngedo'.”

¹¹ Idi kebalaku, “Tuda' ioké ideh kudeng ineh, Tuhan?” KebalaNeh, “Pad macing amung bawang pangeh inusag idi na lemulun, idi pad macing amung ruma' pangeh tican, idi bawang ineh mangun ku su luk ali-ali.

¹² Ui miak nguit lemulun ineh amé' mado, pad aput bawang ineh dat ali.

¹³ Sagan pana' seburur ketecan rat arang pulu' burur, ieh miak pitayen; ieh mepad kudeng tued kayuh luk meraben luk pangeh tibpeng.” (Ratnan tued ineh pupu Allah miak mulun baruh.)