YESAYA 58 - BALA LUK DO'

Mawa' Luk Matu

¹ Kebala Tuhan, “Ngitang dengan abud tuehmu! Ngegala' amung sala' pupuKu Israil!

² Ideh sembayang Negku anid-anid aco, idi ideh pian maya' ukumKu idi nganau' luk matu. Ideh mutuh Negku ngeperuan nedeh idi maré ukum luk mesiri nedeh.”

³ Kebaladeh, “Ngudehké tau mawa', kudeng Tuhan na pian nier ineh? Ngudehké tau mesusa', kudeng Ieh na ngerawé ineh?” Kebala Tuhan nedeh, “Setuneh, sagan pana' muyuh mawa', muyuh nakap pian muyuh sebuleng, idi ngedereh lun tebarin muyuh.

⁴ Muyuh pesingaro, pebunu', idi pekedaluh. Miakké Ui ninger putuh muyuh kareb muyuh mawa' kudeng ineh?

⁵ Kareb muyuh mawa', muyuh ngedereh burur muyuh, tekunal mepad kudeng don uduh, idi telubid luun guni idi abuh. Matuké ineh mawa'? Miakké Ui mawang niat ku ineh?

⁶ “Kudeng ini lawéneh mawa' luk pianKu: Neka kaling dereh idi paga' ukum luk na mesiri; idi muit lemulun luk pidereh.

⁷ Maman lemulun luk melau, idi nganak lemulun luk masi' luk na ruma'. Maré ayung kuan lemulun luk na kuyu', idi aleg ara' ngedengan pupu muyuh luk muneng.

⁸ “Idi katuKu nemuyuh mepad kudeng rasat aco kareb pekak, idi urat muyuh saget mepali'. Ui idi dengan muyuh ruked-ruked idi ngulun nemuyuh. Ui ngelibung nemuyuh.

⁹ Kareb muyuh sembayang Ui ngua' putuh muyuh. Kareb muyuh nawar Negku Ui ngor bala muyuh. “Kudeng muyuh ugka' ngedereh lemulun, idi ugka' ratnan situnga idi dat bala;

¹⁰ kudeng muyuh maman lemulun luk melau, idi maré petap kuan lun masi', kali' rungen dacem luk ngelibut nemuyuh miak misu' ku acang muned aco.

¹¹ Idi Ui nguyut nemuyuh ruked-ruked, idi maré petap kuan muyuh. Ui maré tueh burur idi do' ulun nemuyuh, pelé muyuh mepad kudeng kabun luk petap abpa', idi mepad kudeng bued abpa' luk na mekeket.

¹² Pupu muyuh miak mudut luk inusag mon, luun tapin luk mon ineh, pad muyuh tetanen pupu luk nuneb bawang luk inusag idi luk nganau' baruh dalan luk dat.”

Samal Kuan Lemulun Luk Nginita Aco Luk Inan Mudeng

¹³ Kebala Tuhan, “Kudeng muyuh ngeligan Aco luk inan Mudeng idi na maya' pian muyuh sebuleng bang aco sineh; kudeng muyuh mawang niat ku acoKu luk meligan idi ngerayeh neneh dengan na nalan, ngakem, idi pebala mo'-mo',

¹⁴ kali' rungen muyuh ngalap awang ngaceku muyuh mawa Negku. Idi muyuh miak buren aput-aput tana' ngaceku Ui; idi teh muyuh do' udeng bang bawang luk biréKu kuan tepun muyuh Yakub. Ui ini Tuhan pangeh nepebala.”