YESAYA 57 - BALA LUK DO'

Tuhan Ngesala' Nelun Israil Luk Sembayang Inan Akang

¹ Lemulun luk do' maté, idi seburur pana' nateh luk ngerawé nedeh. Iamo' kareb ideh maté, ideh amé' su luk inandeh na uen ngedereh.

² Lemulun luk nganau' luk do' ngalap do' idi awang kareb ideh maté.

³ O muyuh luk melutak ku sala', amé' tungé' pad muyuh kumin! Muyuh ineh lun luk pasét idi decur luk mesawa'.

⁴ Idéké luk inan muyuh situnga? Idéké luk inan muyuh luk mebalih nguto?

⁵ Muyuh megéi' sembayang inan akang muyuh dengan pasét liang kayuh su luk inan muyuh sembayang. Muyuh maré anak muyuh kereten ku baré bang lubang batu luk tangeb abpa'.

⁶ Muyuh sembayang inan batu luk mesalud luk lapen muyuh rat bang abpa' ineh. Muyuh ngukit abpa' anggur ku baré kuandeh, idi maré baré akan pana'. Miakké Ui mawang niat ku ineh?

⁷ Muyuh uké pegkung pad maré baré idi pasét pana'.

⁸ Muyuh naped akang muyuh luk na petulu siren iring munung tanga' muyuh. Muyuh necan Negku. Muyuh ngelengu ayung muyuh idi pasét luun bitaran muyuh luk rayeh dengan lemulun luk uen muyuh mayar.

⁹ Muyuh nganau' umau luk do' buen idi amé' sembayang nan akang Molek. Muyuh ngecuk nelun duken amé' nakap akang luk inan muyuh sembayang rat bang su luk inan até pana'.

¹⁰ Muyuh merur nakap allah-allah luk baken, iamo' na muyuh musam. Muyuh ngerawé akang muyuh luk na petulu siren ngetueh nemuyuh, pad muyuh na tu melaya'.

¹¹ Kebala Tuhan, “Idéké akang-akang ini luk ngatot nemuyuh, pad muyuh mebalih pa kiungKu idi mekelupan Negku? Ugka'ké muyuh matot Negku ngaceku Ui mio nungeng?

¹² Muyuh ngerawé luk ruen muyuh matu, iamo' Ui ngegala' kekamen muyuh, idi kali' rungen akang muyuh na miak ngedengan nemuyuh.

¹³ Kareb muyuh mutuh pedengan, nima' akang muyuh ngedengan nemuyuh! Ideh miak mepalid ku bui luk isuut pana'! Iamo' lemulun luk merapet Negku miak lutep bang bawang ineh idi sembayang Negku bang Ruma'Ku.”

Allah Pejani' Nuneb Idi Ngedo'

¹⁴ Kebala Tuhan, “Nima' pupuKu lumi Negku. Nala' amung-amung luk ngesabeng nedeh! Nganau' dalan temina'!

¹⁵ “Ui ini Allah luk medita' idi meligan, luk mulun ruked-ruked. Ui tudo déi' su luk medita' idi meligan. Idi teh Ui tudo dengan lemulun luk nginuud idi luk mebeneh niat pelé Ui nuneb nedeh pad ideh merapet teh.

¹⁶ Ui nemaré ulun kuan pupuKu, idi Ui na pian ngadu' nedeh idi museh nedeh ruked-ruked.

¹⁷ Ui museh nedeh ngaceku ideh manga, idi ngaceku sala'deh. Dengan useh Ui nengukum nedeh idi nenecan nedeh Iamo' ideh metueh niat idi nemaya' piandeh sebuleng.

¹⁸ “Ui nekali' kekamendeh; iamo' Ui miak ngedo' nedeh. Ui nguyut idi ngedengan nedeh; idi Ui ngubuk lemulun luk mesusa' niat.

¹⁹ Ui maré awang kuan amung-amungdeh luk muneng idi luk mado'! Ui ngedo' pupuKu.

²⁰ Iamo' lemulun luk dat mepad kudeng abpa' rayeh luk melipak, luk na ucu' nguit arap luk melutak.”

²¹ Kebala Tuhan, “Lemulun luk dat na ngalap awang.”