YESAYA 56 - BALA LUK DO'

Arang Pupu Allah Inan Lemulun Ratnan Anid Pupu

¹ Kebala Tuhan inan pupuNeh, “Na mio teh Ui ngulun nemuyuh. Ngaceku ineh do' nganau' luk mesiri idi luk matu.

² Ui ngeperuan lemulun luk ngerawé Aco luk inan Mudeng idi na ngelutak aco ineh. Ui ngeperuan lemulun luk na nganau' anun-anun luk dat.”

³ Na petulu seburur lun pupu baken luk pian maya' Tuhan pebala, “Tuhan na nima' negku sembayang perapu dengan pupuNeh.” Na petulu lemulun luk pinani' pebala, “Ui na miak pamung dengan pupu Allah, ngaceku ui na miak inan anak.”

⁴ Kebala Tuhan kuan lemulun ineh, “Kudeng muyuh ngerayeh Negku idi ngerawé Aco luk inan Mudeng, idi maya' pianKu, idi nginita jani'Ku,

⁵ kali' rungen ngadan muyuh meluun teruayen bang Ruma'Ku idi arang pupuKu, sagan tu pana' muyuh na anak. Na tu ngadan muyuh mekelupan ruked-ruked.”

⁶ Kudeng ini bala Tuhan kuan lun pupu baken luk pamung dengan pupuNeh, idi luk mawa idi maya' Neneh, idi luk ngerawé Aco luk inan Mudeng idi nginita jani'Neh,

⁷ “Ui nated nemuyuh amé' Sion, pegkungKu luk meligan ineh, idi maré nemuyuh mawang niat bang ruma' sembayangKu. Idi Ui ngalap luk barén muyuh luun bubpunKu. Ruma'Ku miak tetanen ruma' luk inan sembayang kuan amung-amung pupu.”

⁸ Tuhan Allah luk nenguit pupuNeh Israil luk tiban muli' pangeh nepejani' nguit pupu baken pad perurum nedeh.

Tuhan Ngesala' Nelun Rayeh Israil

⁹ Tuhan ngecuk pupu baken amé' kuman pupuNeh, mepad kudeng pung luk meliput.

¹⁰ KebalaNeh, “Amung lun rayeh luk petulu mada' pupuKu ineh mebuser, pad ideh na kali' anun-anun. Ideh mepad kudeng uko' luk nginita luk na mangang — ideh telubid idi nginupi mo'. Ideh pelaba pian rudap!

¹¹ Ideh mepad kudeng uko' luk manga luk na mileh mebor. Ideh ineh lun nguyut luk na mileh. Anid-anid bururdeh maya' luk piandeh, idi ngerawé bururdeh sebuleng mo'.

¹² Kebala lun mabuk ini, ‘Do' tau ngalap abpa' anggur idi ngirup macing mebor! Idi nebpa meluun do' ria' tau ratnan aco sini.’ ”