YESAYA 55 - BALA LUK DO'

Tuhan Mada' Ei'Neh

¹ Kebala Tuhan, “O muyuh luk meparing, amé' inan abpa! O muyuh luk na usin, melih bera idi kuman! Melih abpa' anggur idi rata sapi' dengan na raga!

² Ngudehké iko makai usin ku luk na miak kenen, idi nala' tabparmu ku luk na ngebor batek? Do' ninger idi maya' balaKu, pad iko mebor ku akan luk meluun do'.

³ “O pupuKu ninger bala ini idi amé' Negku, pad muyuh ngalap ulun! Ui maré kuan muyuh aceh jani' luk meruked idi ngacing peruan luk pijani'Ku ini Daud kuan muyuh.

⁴ Ui nganau' Neneh ku Lun Nguyut idi ku Lun Ngimet amung pupu pelé Ui ngegala' rayehKu.

⁵ Iko miak nawar pupu baken luk na miti Namu atun, pad ideh mesaget amé' Namu. Ui ini Tuhan Allahmu, ieh ineh Allah Israil luk meligan, miak ngacing amung ineh pad iko buren idi uen ngerayeh.”

⁶ Lumi inan Tuhan idi sembayang pa kiungNeh, kareb Ieh muneng nemuyuh.

⁷ Do' lemulun luk dat necan kekamendeh, idi ngisu' terawédeh. Do' ideh lumi inan Tuhan Allah tau, luk méi' ku lemulun idi luk maré do' ratnan sala'.

⁸ Ngaceku kebala Tuhan, “TerawéKu idi lawéKu baken ratnan terawé idi lawé muyuh.

⁹ Mepad kudeng langit medita' ratnan tana', kudeng ineh teh lawé idi terawéKu meluun dita' ratnan lawé idi terawé muyuh.

¹⁰ “BalaKu mepad kudeng salju idi udan luk mebpeh rat langit idi mubpur tana', pelé tibu mulun idi kebua' pad maré akan.

¹¹ Kudeng ineh teh balaKu kali rungan ngacing luk pianKu.

¹² “Muyuh miak remuat rat babil dengan mawang niat; idi kiuten dengan do'. Amung pegkung, surud, idi lawa kayuh miak ngitang, idi menani mawang niat pa kiung muyuh!

¹³ Tongor miak mulun su luk inan bitarung, idi hadas miak mulun su luk inan tabpa'. Ini mangun ku tanu' luk meruked, idi ku aceh terawé ratnan luk Ui ini Tuhan pangeh nenganau'.”