YESAYA 54 - BALA LUK DO'

Awa Tuhan Nelun Israil

¹ O Yerusalim, atun iko mepad kudeng decur luk na anak. Iamo' do' iko menani idi ngitang ku awang niat. Nekini iko mula' anak, meluun ratnan decur luk na tican awanneh!

² Do' ngeranat lepo kibungmu! Ngekadang abetneh idi ngeraben abpenneh!

³ lakanmu uen ngiuk pekelibut. Pupumu miak ngalap lemubed tana' luk inan pupu baken tudo; pad bawang-bawang luk tican panu'ku lemulun.

⁴ Aleg iko matot — iko na miak uen ngigu'teh! Iko miak mekelupan sétmu luk mon, idi susa'mu kareb iko tinula'.

⁵ Lun luk nemudut namu mangun ku awanmu. Idi ngadanNeh Tuhan luk Melalud! Allah Israil luk Meligan ngulun namu. Ieh ineh raca' amung tana' ini!

⁶ O Israil, iko mepad kudeng awan luk mebaruh, luk mesusa' tu ngaceku tican deléineh. Iamo' Tuhan nawar namu lumi Neneh, kebalaNeh:

⁷ “Ui nenecan namu segageh mo'; dengan awa luk matu Ui ngalap namu baruh.

⁸ Dengan useh Ui neteketed segageh mo', iamo' Ui ngegala' awaKu namu ruked-ruked.” Kudeng ini bala Tuhan luk ngulun namu.

⁹ “Bang kareb Noh Ui nepejani', pad na ngereb tana' teh. Nekini Ui pejani' na museh namu teh. idi na Ui ngukum namu.

¹⁰ Pegkung idi surud miak mekareg iamo' awaKu namu meruked peh. Idi jani'Ku pedo' ruked-ruked teh.” Kudeng ini bala Tuhan luk mawa namu.

Yerusalim Luk Mebaruh

¹¹ Kebala Tuhan, “O Yerusalim, bawang luk pidereh idi mesusa', luk na mubuk. Ui mudut tapinmu mebaruh ratnan batu luk meraga.

¹² Ui nganau' amung pudutmu luk medita' ratnan batu luk mesia', idi tanga'mu ratnan batu luk mesilo kudeng apui, idi libungmu ratnan batu luk meraga!

¹³ “Ui sebuleng mada' pupumu, idi maré nedeh peruan idi do' udeng.

¹⁴ Iko meraben ngaceku sirimu idi luk matu. Iko mado ratnan dereh idi tot.

¹⁵ Kudeng idé-idé sikal metueh rat namu, baken ieh rat Negku. Idé-idé luk sikal metueh rat namu, kali' rungen ieh melaya'!

¹⁶ “Ui mudut lun luk nuno, luk pingiup apui ku nuno pelapet. Idi teh Ui mudut lun pebunu' luk ngaté lemulun ku pelapet ineh.

¹⁷ Iamo' na repapeh luk ku ngurat namu; iko ngelaya' bala lemulun luk ngadu' namu. Ui ngedengan demulun-demulunKu pad ideh metueh.” Tuhan pangeh nepebala.