YESAYA 52 - BALA LUK DO'

Allah Miak Muit Yerusalim

¹ O Yerusalim, do' iko petuneb pad iko metueh idi rayeh teh! O bawang Allah luk Meligan, do' iko ngayung ku ayung luk do'! Lun luk na manu na miak semuet bang namu teh.

² O Yerusalim, do' iko sigegker. Tumui ratnan abuh idi tudo luun kerusimu. O lun Sion luk tiban ineh, do' neka kaling luk ku ngabet nemuyuh!

³ Kebala Tuhan inan pupuNeh, “Na muyuh bilih ku usin: iamo' muyuh nangun ku demulun. Na usin barén ku nguli' nemuyuh, iamo' muyuh miak puatin.

⁴ Mon muyuh tudo déi' Masir mepad kudeng sakai. Muci ratnan ineh muyuh tiban Asur dengan na belih.

⁵ Luk mepad kudeng ineh pangeh mangun déi' Babil nekini; muyuh tiban su ineh dengan na belih. Lemulun luk ngimet nemuyuh medita' niat idi megéi' situnga Negku.

⁶ Iamo' muci aco muyuh miak ngamo idi Ui ini Allah luk nepebala nemuyuh.”

⁷ Pelaba do' ayu lemulun luk guta pegkung pian nguit bala luk do', ieh ineh bala awang! Ieh mada' ratnan tuehneh, idi kebalaneh kuan Sion, “Allah muyuh ineh raca'!”

⁸ Lun luk matar bawang ineh peranga' ngitang ku awang niatdeh! Ideh nier dengan matehdeh sebuleng acing Tuhan rat Sion!

⁹ O Yerusalim luk inusag ineh, do' iko ngitang dengan awang niat! Tuhan nengubuk pupuNeh idi nenuneb bawangNeh.

¹⁰ Tuhan nengulun pupuNeh ku laludNeh luk meligan, pad kali' aput tana'.

¹¹ O muyuh luk nguit repapeh luk meligan, buro rat Babil! Aleg ngakem anun-anun luk bibpeng; do' muyuh meligan idi remuat!

¹² Setuneh na muyuh petulu buro denak-denak kudeng lemulun luk upun buro! Tuhan Allah muyuh nalan pa atun muyuh idi matar nemuyuh.

Demulun Luk Pidereh

¹³ Kebala Tuhan, “Kekamen DemulunKu miak inan peruan; Ieh uen ngerayed idi buren.

¹⁴ Mula' lemulun mawa nier Neneh ngaceku ayuNeh nisu' pad Ieh na miti kudeng ayu lemulun.

¹⁵ Iamo' nekini mula' pupu mawa nier Neneh, idi raca'-raca' semiep tang ku awadeh. Ideh miak nier idi kali' luk nateh nekali' deh atun.”