YESAYA 51 - BALA LUK DO'

Bala Ubuk Kuan Sion

¹ Kebala Tuhan, “O muyuh luk amé' Negku luk pian mutuh pedengan, pad muyuh uen ngulun, do' ninger balaKu. Do' ngerawé batu su luk inan muyuh kinuer, idi lubang luk inan muyuh ilap.

² Ngerawé tepun muyuh, Ibrahim idi Sara luk nenginul nemuyuh. Kareb Ui nenawar Ibrahim, na anakneh, iamo' Ui nengeperuan neneh dengan maré anak; idi Ui nenganau' inulNeh pelaba ula'.

³ “Idi Tuhan miak méi' inan Sion dengan amung usagneh. Bawangneh luk ali-ali ruenKu ku kabun, mepad kudeng kabun luk inau'Ku déi' Eden. Inan teh awang idi do' ria' su ineh, dengan tuda'-tuda' nani ubur kuanKu.

⁴ “O pupuKu, do' ninger balaKu. Ui maré bada'Ku kuan amung pupu. UkumKu ngacing acang kuandeh.

⁵ Ui mesagét macing amé' ngulun nedeh; kareb tuehKu malé macing. Ui sebuleng miak ngimet amung pupu. Bawang luk mado pana' nganét acingKu. Ideh merapet Negku ngulun nedeh.

⁶ Do' nier langit idi tana' pana'! Mepad kudeng rabpun langit miak buro. Idi mepad kudeng kuyu' luk mon, tana' miak mabud, idi tuehKu na kekipedneh.

⁷ “O muyuh luk kali' luk matu idi luk ngerawé bada'Ku, do' ninger balaKu. Aleg matot kareb lemulun ngedat idi situnga nemuyuh.

⁸ Lemulun luk kudeng ineh miak mabud, mepad kudeng kuyu' luk kenen kutang! Iamo' ulun luk uenKu ngacing meruked idi tuehKu na kekipedneh.”

⁹ O Tuhan, do' tumui idi ngedengan nekai! Ngulun nekai ku laludMu; maya' kudeng luk inau'Mu mon. Iko ineh nengaté galau Rahab luk bang abpa' rayeh.

¹⁰ Iko ineh nengekeket abpa' rayeh, pelé lemulun luk ruenMu ngulun miak guta maya' ineh.

¹¹ Lemulun luk pinuitMu miak macing Yerusalim, dengan menani idi ngitang mawang niat. Ideh mawang niat ruked-ruked, idi na tu kali' susa' idi dat niat.

¹² Kebala Tuhan, “Ui ini luk ngetueh nemuyuh. Ngudehké iko matot ku lemulun luk maté, luk mekamu' ulun mepad kudeng uduh?

¹³ Miakké iko mekelupan Tuhan luk nemudut namu, idi luk nenganau' tapin tana' ini? Ngudehké iko mulun dengan megéi' matot ku useh lemulun luk ngedereh namu, idi lemulun luk temina' ngaté namu? Usehdeh ineh na miak ngurat namu!

¹⁴ Na mio teh lun luk tiban miak puatin; ideh mekadang ulun, idi teh petap akan.

¹⁵ “Ui ini Tuhan Allahmu. Ui ngelipak abpa' rayeh pad ieh meberi. NgadanKu ineh Tuhan luk Melalud!

¹⁶ Ui ini luk nemalad langit, idi luk nenganau' tapin tana'; kebalaKu kuan Sion, ‘Muyuh ineh pupuKu! Ui nemaré bada'Ku nemuyuh, idi ngelibung nemuyuh ku ticu'Ku.’ ”

Kekiped Dereh Yerusalim

¹⁷ O Yerusalim, do' iko tumui idi tuped! Iko pangeh nengirup ratnan sangkir ukum luk biré Tuhan rupenmu ngaceku usehNeh. Iko nengirup ineh pad iko mepidar!

¹⁸ Seburur pana' nateh luk miak nguyut namu, rat arang pupumu seburur pana' nateh luk miak ngimet ticu'mu.

¹⁹ Iko neketukan ku susa' luk dueh ini: bawangmu inusag ngaceku pebunu', idi teh pupumu melau. Seburur pana' nateh luk miak méi' namu.

²⁰ Anid lisangen dalan inan lemulun luk melepu ku laya' bururdeh. Ideh mepad kudeng payo luk mekaneh abpung. Ideh pangeh nekali' useh Allah luk pelaba bura'.

²¹ O lun Yerusalim luk pelaba dereh, muyuh mepidar mepad kudeng lun mabuk.

²² Kebala Tuhan Allah luk ngedengan nemuyuh, “Ui ngalap rat nemuyuh sangkir luk biréKu nemuyuh ngaceku Ui museh nemuyuh. Rat pad sini muyuh na ngirup abpa' anggur luk nganau' nemuyuh mepidar ineh.

²³ Ui maré ineh kuan lemulun luk ngedereh nemuyuh, idi luk nenganau' nemuyuh telubid iring dalan idi luk nengeradu' nemuyuh mepad kudeng abuh.”