YESAYA 50 - BALA LUK DO'

¹ Kebala Tuhan, “Matuké iko ngerawé Ui nengecuk tinanmu buro, mepad kudeng deléi luk patad ratnan awanneh? Kudeng pieh kudeng ineh, iapehké surat patad? Matuké iko ngerawé Ui masui namu kuan lun luk naban, mepad kudeng lemulun luk masui anakneh mangun ku demulun? Na tu! Iko tiban ngaceku sala'mu, idi ngaceku kekamenmu luk dat tinanmu pangeh ligkan.

² “Ngudehké pupuKu na nengor balaKu, kareb Ui iné' ngulun nedeh idi nenawar nedeh? Matuké Ui melaya' pad na miak ngulun nedeh? Dengan sebuleng ecuk Ui miak ngekeket abpa' rayeh, idi ngisu' abpa' mangun ku su luk ali-ali; pad lawid maté ngaceku na abpa';

³ Ui miak ngedacem langit, pad ayuneh kudeng temido nelun naté.”

Do' Baya' Demulun Tuhan

⁴ Tuhan nemada' Negku ratnan luk belénKu, pelé Ui ngetueh lemulun luk merur. Anid pekak Ieh nganau' Negku geregan ninger luk badénNeh Negku.

⁵ Tuhan nemaré ileh Negku, pad Ui na sikal metueh idi teketed rat Neneh.

⁶ Ui nenima' lun mebal ketedKu. Ui na nemebpeng nedeh kareb ideh nengedat Negku, kareb ideh nemubput buluh tangKu, idi ngelica' kiungKu.

⁷ Iamo' baladeh luk dat na ngurat Negku, ngaceku Tuhan Allah ngedengan Negku. Ui ngetueh bururKu pad Ui tuman ku bala ineh, Ui kali' idi Ui na miak uen ngigu',

⁸ ngaceku Allah idi muneng Negku, idi Ieh miak ngamo Negku na mesala'. Inanké lemulun pian ngadu' Negku? Do' kiteh pad-pad amé' besara'! Nima' neneh ngadu' Negku!

⁹ Tuhan sebuleng ngedengan Negku — idéké miak mada' Negku mesala'? Amung lun luk ngadu' Negku miak buro, mepad kudeng kibung luk kinan kutang!

¹⁰ O lun muyuh luk matot nan Tuhan, idi luk maya' bala DemulunNeh — Kareb muyuh maya' dalan luk medacem, do' manu inan Tuhan idi merapet inan Allah muyuh.

¹¹ O muyuh luk ngapui idi nguit sesakan, do' muyuh sebuleng nalan bang apui ineh, idi arang sesakan luk tinutud muyuh. Ini ukum luk barénKu nemuyuh; muyuh miak maté dengan medereh.