YESAYA 5 - BALA LUK DO'

Nani Ratnan Kabun Anggur

¹ Do' ninger naniku ratnan Rurumku idi kabun anggurNeh: Rurumku inan kabun anggur luun surud luk mebaleng.

² Ieh nengukat tana' idi nenala' amung batu. Ieh nenibu anggur luk meluun do'. Ieh nemudut lepo luk medita' pad matar kabun ineh. Ieh nenganau' su luk inan ngeradu' bua' anggur ineh. Ieh nenginulat anggur ineh melak, iamo' amung bua' ineh melam.

³ Idi kebala Rurumku, “Do' muyuh luk tudo déi' Yerusalim idi Yahuda mutut ukum arang kabun anggurKu idi Ui.

⁴ Inanké luk na inau'Ku kuanneh? Ngudehké bua'neh melam, idi na mepad kudeng luk pianKu?

⁵ “Ini luk ruenKu kuan kabun anggurKu. Ui mubput tibu luk pekelibut, idi ngusag ar luk ngelibung neneh, pad pung luk meliput miak kuman bua'neh idi ngeradu' neneh.

⁶ Ui nima' neneh mapet ku uduh. Ui na nangal angatneh idi na netad libutneh, iamo' Ui nima' uduh idi tabpa' mulun su ineh. Idi teh Ui mebpeng laput na maré udan luunneh.”

⁷ Israil ineh kabun anggur Tuhan luk Melalud; pupu Yahuda ineh anggur luk tinibuNeh. Ieh merapet nedeh nganau' luk do', iamo' ideh nengaté lemulun, Ieh merapet nedeh nganau' luk matu, iamo' lun luk piderehdeh nengitang ku susa'deh.

Sala' Luk Inau' Lemulun

⁸ Muyuh miak kumin! Muyuh ngula' ruma' idi lati' muyuh, pad na luk inan lun baken tudo, idi muyuh sebuleng mo' luk tudo bang bawang ineh.

⁹ Ui neninger Tuhan luk Melalud pebala, “Ruma' luk rayeh idi luk do' ini miak uen ngusag.

¹⁰ Uli' kabun anggur luk limeh ikar segilin mo' abpa'neh. Uli' pulu' gatang pimara segatang mo'.”

¹¹ Muyuh miak kumin! Muyuh tumui uka'-uka' idi ngirup, idi muyuh mio rudap medacem ngaceku mabuk.

¹² Kareb irau muyuh, inan gita, karing, suling, idi abpa' anggur. Iamo' muyuh na kali' luk ruen Tuhan.

¹³ Ngaceku ineh muyuh miak tebanen. Lun rayeh muyuh miak maté ku lau, idi lun mula' maté ku paring.

¹⁴ Su luk inan até melau nganét nedeh, idi tangneh mukab. Ieh nelen amung lun do' rat Yerusalim perapu lun mula' luk meria'.

¹⁵ Amung-amung lemulun miak uen ngigu' idi idé-idé luk medita' niat pana' uen ngebeneh.

¹⁶ Iamo' Tuhan luk Melalud nganau' luk matu, pad Ieh ngegala' rayehNeh, idi teh Ieh ngukum pupuNeh pad ngegala' liganNeh.

¹⁷ Luun usag bawang ineh anak dumba idi anak amék kuman uduh.

¹⁸ Muyuh miak kumin! Muyuh na miak mepuit ratnan sala' muyuh.

¹⁹ Kebala muyuh, “Do' Tuhan miket nganau' luk belénNeh, pad tau miak kali' ineh. Do' Allah Israil luk Meligan ngacing luk pianNeh, pad tau miak nier ineh.”

²⁰ Muyuh miak kumin! Muyuh neten luk dat do' idi luk do' dat. Muyuh ngisu' dacem mangun ku acang, idi acang mangun ku dacem. Muyuh nganau' luk mepét mangun mepaci', idi luk mepaci' mangun mepét.

²¹ Muyuh miak kumin! Muyuh ngerawé burur muyuh pelaba ileh.

²² Muyuh miak kumin! Muyuh mebala kareb muyuh muar luk rupen!

²³ Iamo' muyuh muit nelun mesala', kudeng ideh maré suap, idi muyuh mebpeng nelun luk matu na ngalap ukum luk mesiri.

²⁴ Ngaceku ineh mepad kudeng geramih idi uduh luk tekering sabpen ku apui, kudeng ineh teh uat muyuh miak melu idi busak muyuh miak melayuh idi mepalid ku bui, ngaceku muyuh nenecan bada' Tuhan luk Melalud, ieh ineh bada' Allah Israil luk Meligan.

²⁵ Tuhan museh inan pupuNeh idi pangeh nenatang ticu'Neh sikal ngukum nedeh. Pegkung miak meruyuh, idi butung lun naté tacin luun dalan mepad kudeng arap. Sagan tu pana' kudeng ineh useh Tuhan na ugka' iamo' ticu'Neh uen natang sikal ngukum teh.

²⁶ Tuhan nateg tawak nawar pupu luk mado. Ieh niuk nawar nedeh rat iring tana'. Idi ideh macing, mawer idi miket.

²⁷ Seburur pana' rat arangdeh nateh luk merur idi luk metebaceng. Na ideh medacep mateh. Abet awa'deh mepicet; kasutdeh na medarak.

²⁸ Ilebdeh metadem idi binordeh temina'. Lisun kuda metueh mepad kudeng batu idi roda kerétadeh medier kudeng libuleh.

²⁹ Lun pebunu' ngarod kudeng balang luk pangeh nengaté pung idi naban ineh pad na miak lapen rat nedeh.

³⁰ Kareb ineh, ideh miak ngarod pa luun Israil mepad kudeng beri abpa' rayeh. Siruh bawang ini! Medacem idi mesusa! Acang misu' ku dacem.