YESAYA 49 - BALA LUK DO'

Acang Kuan Amung Pupu

¹ O bawang idi pupu luk mado, ninger balaKu! Kareb nateh Ui tinganak Tuhan nemili' Negku, idi nengeletep Negku mangun ku DemulunNeh.

² Ieh nenganau' balaKu metadem kudeng pelapet; Ieh nematar Negku ku ticu'Neh sebuleng. Ieh nenganau' Negku mepad kudeng ileb luk metadem, luk temina' uen makai.

³ KebalaNeh Negku, “O Israil, Iko ineh DemulunKu. Ui miak buren lemulun ngaceku Iko.”

⁴ KebalaKu, “Ui pangeh nengakem mo'-mo', Ui nengabud tuehKu, iamo' na bua'neh.” Iamo' Ui merapet inan Tuhan nuneb kekamen ineh; idi Ieh miak ngua' kuanKu

⁵ Tuhan nengeletep Negku, kareb nateh Ui tinganak, pad Ui mangun ku DemulunNeh idi nguli' pupu Yakub, idi inul Israil pana'. Tuhan maré ubur Negku. Ieh ineh lawa tuehKu.

⁶ Kebala Tuhan Negku, “O DemulunKu, Ui inan kekamen luk meluun rayeh kuanMu. Baken Iko nguli' pupu Yakub, idi inul Israil mo'. Iamo' Ui nganau' Namu ku acang amung pupu, pelé Iko ngacing ulun bang aput tana'.”

⁷ Kebala Allah Israil luk Meligan idi Lun Nengulun, kuan Lemulun luk dinat idi luk inan amung pupu megateh, ieh ineh Demulun amung raca'. “Raca'-raca' miak nier Namu puatin, pad ideh tumui idi ngedita' Namu. Anak-anak raca' pana' miak nier ineh, idi tekeradung pad ngerayeh Namu.” Amung ini miak mangun ngaceku Tuhan Allah Israil luk Meligan, pangeh nemili' DemulunNeh idi maya' jani'Neh.

Yerusalim Uen Nuneb

⁸ Kebala Tuhan kuan pupuNeh, “Bang kareb luk petulu, Ui méi' nemuyuh idi ngulun nemuyuh. Kareb muyuh mutuh pedengan, Ui ninger arod muyuh. Ui miak matar idi ngelibung nemuyuh, pad muyuh mangun ku aceh jani' kuan amung pupu. Idi teh Ui ngeletep nemuyuh bang bawang muyuh luk tican.

⁹ Ui pebala kuan lun luk tiban, ‘Do' muyuh mepuit!’ Idi kuan lun luk tudo bang dacem, ‘Do' semuet bang acang!’ Kareb ineh ideh mepad kudeng dumba bang laman;

¹⁰ na ideh melau idi meparing. Na ideh medereh ku ét idang idi bui luk melau', ngaceku ideh kiuten Lun luk mawa nedeh. Ieh nguyut nedeh macing inan bued abpa'.

¹¹ “Ui nganau' aceh dalan guta pegkung, idi teh aceh dalan luk delanin pupuKu.

¹² PupuKu miak macing rat mado, rat pa tinueh busat aco idi pa acep aco, idi teh rat bawang Sinim luk pa kabing busat aco.”

¹³ O langit, do' menani! O tana', ngitang mawang niat! Nima' amung pegkung menani teh! Tuhan miak ngubuk pupuNeh. Ieh méi' nan pupuNeh luk medereh.

¹⁴ Iamo' kebala lun Yerusalim, “Tuhan pangeh nenecan netau! Ieh nekelupan netau.”

¹⁵ Idi kebala Tuhan nedeh, “Miakké decur mekelupan anakneh, idi megateh inan anak luk tinganakneh? Sagan pana' decur mekelupan anakneh, Ui na tu mekelupan nemuyuh.

¹⁶ O Yerusalim, na tu Ui mekelupan namu, ngadanmu inayudKu luun paladKu.

¹⁷ “Lemulun luk mudut namu baruh, malé macing, idi lemulun luk nengusag namu miak buro.

¹⁸ Nier luk mangun libut-libutmu. Pupumu mepamung pian muli'! Ui ini Tuhan Allah luk mulun pebala, kali' rungen iko mawang niat ngaceku pupumu, mepad kudeng aceh decur luk ngaweh mawang niat ku banéneh!

¹⁹ “Bawangmu inusag atun idi dat ali — iamo' nekini ieh pelaba isuut kuan lemulun luk amé' tudo su ineh! Idi lemulun luk nengusag namu miak lapen amé' mado rat namu.

²⁰ Anak luk tinganak kareb pupumu tiban, miak pebala namu muci, ‘Bawang ini isuut. Do' maré tana' kuan kai!’

²¹ Idi iko miak pebala bang niatmu, ‘Idéké nenganak anak ni kuanku? Atun ui na anak idi na miak nenganak. Ui tiban idi tila', idéké nengasa' anak ini? Ui pangeh tican buleng-buleng — rat iapehké anak-anak ini lek?’ ”

²² Kebala Tuhan Allah kuan pupuNeh, “Ui nateg tawak nawar amung pupu, pelé ideh nguit anak-anakmu muli'.

²³ Raca'-raca' miak mangun mepad kudeng tamanmu; raca'-raca' decur ngasa' namu mepad kudeng aceh tinan. Ideh tekeradung pa kiungmu idi ngedita' namu, dengan mebeneh niat. Iko miak kali' idi Ui ini Tuhan. Lemulun luk merapet ku pedenganKu kali' rungen denganin.”

²⁴ Miakké binaweh luk inaro lun pebunu' lapen rat neneh? Miakké lun luk tiban lun luk mesangit puatin?

²⁵ Kebala Tuhan, “Amung ineh miak mangun. Lun luk tiban lun pebunu' miak lapen rat neneh, idi binaweh luk inaro lun luk mesangit miak tebanen rat neneh. Ui miak munu' lemulun luk munu' namu, idi Ui miak muit anak-anakmu.

²⁶ Ui nganau' lun luk ngedereh namu pepaté; ngaceku ideh mabuk ku gateh idi pian ngaté. Idi amung lemulun miak kali' Ui ini Tuhan, Lun luk ngulun idi luk nguit namu. Ideh miak kali' Ui ini Allah Israil luk Melalud.”