YESAYA 48 - BALA LUK DO'

Allah Ineh Tuhan Pa Luun Amung Luk Mangun Muci

¹ O pupu Israil, do' ninger bala ini, muyuh luk inul Yahuda. Muyuh pebulung ku ngadan Tuhan, idi neten ngadan Allah Israil — iamo' baken dengan matu idi mesiri.

² Iamo' muyuh pebala dengan medita' niat, “Kai lemulun rat bawang luk meligan, idi kai merapet inan Allah Israil, luk titen Tuhan luk Melalud.”

³ Kebala Tuhan kuan Israil, “Mon Ui nemada' ratnan luk miak mangun; idi denak-denak Ui nengacing ineh!

⁴ Ui nekali' atun iko miak metueh niat, metueh kudeng belawan idi tekaling pana'.

⁵ Mon Ui nemada' ratnan luk macing kuanmu, idi nemada' luk mangun kareb nateh ineh nacing, pad iko na pebala, ‘Akangku nenganau' ineh, idi allah luk inau'ku nengacing ineh.’

⁶ “Amung luk bilaKu atun pangeh nangun; iko na miak na mala luk bilakU matu. Nekini Ui mada' namu ratnan luk mangun mebaruh, ieh ineh luk na ginala'Ku atun.

⁷ Nekini mo' Ui ngacing ineh; na luk kudeng ini atun. Kudeng inan, kali' rungen iko pebala, ‘Ui nekali' ineh.’

⁸ Ui nekali' iko na inan merapet; rat punmu tinganak, iko sikal metueh. Ineh punneh, iko na neninger ratnan ineh; seburur pana' nateh luk nemada' namu.

⁹ “Ui ngagka' usehKu, pad lemulun ngubur ngadanKu. Ui ngagka' pelé iko na pitayen.

¹⁰ Ui nenutun namu bang apui dereh mepad kudeng pirak tetunin bang apui pana'. Iamo' Ui nekali' namu na mayu.

¹¹ Luk ruenKu ineh maya' pianKu sebuleng — Ui na nima' ngadanKu uen ngigu', pad lun baken ngalap ubur, luk petulu barén kuan bururKu sebuleng.”

Kores Lun Nguyut Luk Pinili' Tuhan

¹² Kebala Tuhan, “O Israil, pupu luk pinili'Ku, do' ninger balaKu, Ui ini mo' luk Allah, luk pun-pun idi luk kekiped teh!

¹³ Ticu'Ku nemudut tana' idi nemalad langit teh. Kareb Ui nawar nedeh ideh petacu amé' Negku.

¹⁴ “O lun muyuh, do' mepamung idi ninger! Sebuleng akang pana' nateh luk miak mada' atun, ratnan lun luk pinili'Ku ngerieng Babil; lemulun ineh miak nganau' luk pianKu.

¹⁵ Ui ini luk nepebala idi nenawar neneh, Ui nenguyut neneh idi nemaré tueh neneh.

¹⁶ “Do' amé' Negku idi ninger balaKu. Rat pun-pun Ui nemada' nemuyuh dengan megala', idi megéi nengacing balaKu ineh.” (Idi nekini ui ini, Yesaya, duken Tuhan Allah idi RohNeh.)

Terawé Tuhan Ratnan PupuNeh

¹⁷ Kebala Tuhan Allah Israil luk meligan luk ngulun nemuyuh, “Ui ini Tuhan Allah muyuh luk mada' luk do' kuan muyuh, idi luk nguyut nemuyuh maya' dalan luk petulu.

¹⁸ “Kudeng muyuh pangeh nengalap amung ukumKu, awang niat manud nemuyuh mepad kudeng abpa' luk na mekeket! Idi tueh melipak amé' nemuyuh, mepad kudeng ribut déi' abpa' rayeh.

¹⁹ Idi inul muyuh mepad kudeng bada. Idi ngadandeh na miak uen ngiu' rat pa kiungKu.”

²⁰ Remuat rat Babil! Buro rat nelun Kasdim! Do' ngitang mada' bala iapeh-iapeh dengan mawang niat: “Tuhan pangeh nengulun demulunNeh Israil!”

²¹ Kareb mét idang Tuhan nenguyut pupuNeh déi' su luk ali-ali, iamo' na ideh meparing. Ieh nemila' batu pad abpa' manud kuandeh.

²² Kebala Tuhan, “Na luk idi awang kuan lemulun luk mesala'.”