YESAYA 47 - BALA LUK DO'

Babil Kumin

¹ Kebala Tuhan, “O Babil, temurun ratnan kerusimu, idi tudo luun abuh. Atun iko mepad kudeng anak adi' decur, aceh bawang luk na linaya'! Idi nekini na iko do' taga idi lun do', iamo' iko demulun mo'.

² Do' ngalap iung idi amé tupeh! Do' nala' ebpu uluhmu idi ngelengu ayungmu! Ngikit takipmu pad guta abpa'.

³ Lun mula' miak nier namu lubpa idi uen ngigu'; Ui miak ngua'! Seburur pana' nateh luk mebpeng Negku.”

⁴ Allah Israil luk Meligan muit netau — ngadanNeh ineh Tuhan luk Melalud!

⁵ Kebala Tuhan kuan Babil, “Tudo bang dacem idi ungeng; na ideh neten namu Raca' decur amung pupu teh

⁶ Ui megateh inan pupuKu pad Ui na ngerawé nedeh Ui kuan; Ui nemaré nedeh bang paladmu, idi iko na méi' nedeh. Lun merar pana' piderehmu.

⁷ Iko nengerawé iko raca' decur macing ruked-ruked teh, idi na iko meberat niat ku amung, ineh, pad iko nengerawé kekipedneh.

⁸ “O Babil luk mawa ku rot, do' ninger balaKu, iko luk ngerawé na inan susa', idi luk ngerawé namu mepad rayeh kudeng Allah, pad na lun baken luk mepad kudeng iko. Iko nengerawé na iko mangun ku tinula', idi na anakmu miak maté.

⁹ Iamo' bang selinggageh, idi bang seaco mo' amung ineh miak mangun. Sagan tu pana' iko mangun, anakmu maté idi iko mangun ku tinula'.

¹⁰ “Iko na migu' ku datmu; idi nengerawé na iko siren lun baken. Iko neraruh ku ileh idi do' kali'mu, pad iko nepebala bang niatmu, ‘Ui ini Allah — na lun baken luk mepad kudeng ui!’

¹¹ Susa' miak macing namu, idi bangunmu na miak mebpeng ineh. Usag macing namu denak-denak, ieh ineh usag luk na teruayenmu!

¹² Kian, kudeng iko makai bangunmu idi lapadmu, luk inanmu pekalai rat isuut, miak iko denganin ineh lek, pad iko ngatot amung bunu'mu.

¹³ Sagan tu pana' iko badén lun mileh, iko pelaba laya'. Nima' lun mileh ineh amé' ngulun namu, ieh ineh lun luk nier langit idi gituen, idi luk mada' ratnan luk miak mangun kuanmu bang anid-anid bulan.

¹⁴ “Ideh mepad kudeng uduh luk tekering luk miak sabpen bang apui! Ideh na miak ngulun bururdeh sebuleng — budung apui pelaba lau' kuandeh. Na ieh apui luk inandeh singidu.

¹⁵ Kudeng ini kekiped bada' lun luk nier langit, ieh ineh luk tuninmu ruked ulunmu. Ideh necan namu idi maya' lawédeh sebuleng, pad seburur pana' nateh luk ketecan luk ngulun namu.”