YESAYA 46 - BALA LUK DO'

¹ “Ini kekiped amung akang Babil! Bel idi Nebo luk inandeh sembayang atun, nekini baben luun keted keladai luk melaya'.

² Ini kekiped akang ini luk na miak ngulun bururdeh. Ideh kamen idi tebanen.

³ “O inul Yakub, pupuKu luk ketecan, do' ninger balaKu. Ui nengasa' nemuyuh rat pun muyuh tinganak.

⁴ Ui ini Allah muyuh luk miak ngasa' nemuyuh, pad macing muyuh mengered, idi abpuk muyuh mebuda'. Ui nemudut nemuyuh idi ngasa' nemuyuh, Ui ngedengan idi teh Ui ngulun nemuyuh.”

⁵ Kebala Tuhan, “Idéké miak uen maad denganKu? Inanké lun baken luk mepad kudeng Ui?”

⁶ Lemulun ngukab kapildeh idi ngeruat amas; ideh nimang pirak idi nabpar lun tukang amas, pad ieh nganau' akang luk inandeh sembayang!

⁷ Ideh maan ineh idi ngerareng ineh su luk inanneh, pad ieh na miak mubuh. Kudeng lemulun sembayang neneh ieh na miak ngor, idi ngulun neneh ratnan susa'.

⁸ “O muyuh lun mesala', ngerawé bala ini, ngerawé ratnan luk inau'Ku.

⁹ Ngerawé ratnan luk nangun mon; do' ngamo ratnan Ui mo' luk Allah idi na lun baken luk mepad kudeng Ui.

¹⁰ Rat pun-pun idi rat mon pana', Ui nemada' ratnan luk miak mangun. KebalaKu, ‘TerawéKu na miak na uen ngacing. Ui nganau amung-amung luk pianKu.’

¹¹ Ui nawar seburur lemulun rat pa busat aco, Ieh semiling mepad kudeng kanui, pad ngacing luk pianKu. Ui pangeh nepebala idi balaKu ineh uen ngacing.

¹² “O muyuh luk metalang niat, luk na manu ku tuehKu, do' ninger balaKu.

¹³ Na mio teh Ui ngacing aco tuehKu. TuehKu na miak uen ngiuk. Ui miak ngulun Yerusalim idi teh ngerayeh Israil su ineh.”