YESAYA 45 - BALA LUK DO'

Tuhan Mili' Kores Mangun Ku Raca'

¹ Kores ineh raca' luk pinili' Tuhan! Tuhan nengeletep neneh ngelaya' mula' pupu; Ieh nengecuk neneh ngelaya' raca'-raca'. Tuhan miak ngukab tanga' bawang kuanneh. Kebala Tuhan ni Kores,

² “Ui sebuleng nganau' dalan kuanmu, idi ngeraked pegkung idi surud pana'. Ui miak ngusag amung tanga' tekaling idi mutul palin belawandeh.

³ Ui ngeruat kuanmu binaweh luk inalum bang su luk medacem; pad iko kali' Ui ini Tuhan Allah lun Israil luk nemili' namu.

⁴ Ui ngeletep namu ngedengan demulunKu Israil, ieh ineh pupu luk pinili'Ku. Ui pangeh nengedita' namu, sagan tu pana' iko na miti Negku.

⁵ “Ui ini Tuhan; na Allah baken rat Negku. Ui maré petap tueh namu, sagan pana' iko na miti Negku,

⁶ pelé amung lemulun aput tana' kali' Ui ini Tuhan, idi na Allah baken rat Negku.

⁷ Ui nganau' acang idi dacem pana'; Ui ngacing peruan idi susa' teh. Ui ini Tuhan luk nganau' amung ineh.

⁸ Ui ngacing tueh rat langit, mepad kudeng udan; tana' mukab pad ngalap ineh, idi kebua' pad inan puit idi siri. Ui ini Tuhan luk ngacing amung ineh.”

Tuhan Pa Luun Amung Pudut Idi Kekamen Lemulun

⁹ Miakké kuden luk pekalai pesaad nelun luk mudut neneh? Miakké tana' salit ngedat nelun luk mileh mudut neneh?

¹⁰ Mekuu'ké anak pebala nan taman-tinanneh, “Ngudehké medueh nganau' negku kudeng ini?”

¹¹ Kebala Tuhan Allah Israil luk meligan, luk ngeletep luk mangun muci. “Muyuh na miak ngitun Negku ratnan anakKu, idi mada' luk petulu ruenKu!

¹² Ui ini luk nemudut tana' ini, idi luk nemudut lemulun luk tudo su ini. Dengan laludKu Ui nemalad langit. Ui luk ngimet aco, bulan, idi gituen.

¹³ Ui luk nengegio Kores, pad ieh ngacing terawéKu idi nganau' luk matu. Ui miak ngesiri amung dalan luk delaninneh. Kores mudut baruh bawangKu Yerusalim, idi muit pupuKu luk tiban ineh. Na lun nabpar neneh pad ieh nganau' kudeng ineh.” Tuhan luk Melalud pangeh nepebala.

¹⁴ Kebala Tuhan kuan Israil, “Binaweh Mesir idi Sudan pana' iko kuan, idi lun luk medita' rat Seba mangun ku demulunmu, ideh uen ngaling idi maya' namu. Ideh tekeradung pa kiungmu idi ngamo, ‘Allah idi denganmu — Ieh mo' luk Allah.

¹⁵ Allah Israil luk ngulun pupuNeh, Ieh ineh Allah luk ngelinged bururNeh sebuleng.

¹⁶ Lemulun luk mudut akang miak uen ngigu'.

¹⁷ Iamo' Israil inulun Tuhan; idi tuehneh macing ruked-ruked. Pupuneh na miak uen ngigu'.’ ”

¹⁸ Tuhan nemudut amung langit — Ieh sebuleng mo' luk Allah! Ieh nenganau' tana' ini pad ieh meraben! Na Ieh nemudut ineh ku su luk ali-ali, iamo' ku su luk inan lemulun tudo. Ieh ineh luk pebala, “Ui ini Tuhan, idi na Allah baken rat Negku.

¹⁹ Ui na nengalum balaKu idi nengelinged terawéKu. Ui na nengecuk pupuKu Israil nakap Negku mo'-mo' bang su luk medacem. Ui ini Tuhan idi Ui pebala luk matu. Ui ngegala' luk matu.”

Tuhan Idi Amung Akang Babil

²⁰ Kebala Tuhan, “O amung pupu, do' muyuh mepamung, amung lun luk ketecan kareb imet Babil inusag. Do' muyuh amé' besara'! Lemulun luk pekarur dengan akang kayuhdeh, idi luk sembayang inan akang luk na ngulun nedeh, na kali' anun-anun!

²¹ Do' ngukab besara' idi mada' terawé muyuh; do' muyuh pegayam arang muyuh sebuleng. Idéké luk nemada' mon ratnan luk mangun muci? Ui ini Tuhan Allah luk ngulun pupuNeh. Na Allah baken rat Negku.

²² “O Amung pupu luk aput-aput tana', do' lumi amé' Negku idi ngalap ulun! Ui ini mo' luk Allah.

²³ BalaKu ineh matu idi na miak misu'. Ui pebulung ku bururKu sebuleng: Amung lemulun miak tekeradung pa kiungKu, idi pejani' maya' Negku.

²⁴ “Ideh miak pebala, “Ratnan Tuhan mo' inan tueh idi lalud.’ Iamo' amung lemulun luk megateh Negku uen ngigu'.

²⁵ Ui ini Tuhan miak ngulun amung inul Yakub, pelé ideh ngubur Negku.