YESAYA 44 - BALA LUK DO'

Tuhan Sebuleng Mo' Luk Allah

¹ Kebala Tuhan, “O demulunKu Israil, ninger do'-do', O pupuKu, inul Yakub luk pinili'Ku.

² Ui ini Tuhan luk nemudut namu; rat pun ulunmu, Ui nengedengan namu. Aleg matot, iko ineh demulunKu, idi pupu luk pinili'Ku luk inanKu mawa.

³ “Ui maré abpa' kuan tana' luk tekering, idi nganau' arur manud déi' su luk ali-ali. Ui ngutang laludKu kuan anak-anakmu, idi ngeperuan amung inulmu.

⁴ Ideh miak do' ulun, mepad kudeng uduh luk uen mubpur, idi mepad kudeng bulu' luk tangeb abpa'.

⁵ “Tesebuleng-tesebuleng pebala, ‘Ui ini Tuhan kuan,’ Idi teh, ‘Ui ini lun Israil.’ Ideh miak matik ngadan Tuhan luun ticu'deh, idi neten ngadandeh Israil.”

⁶ Kudeng ini bala Tuhan luk ngimet idi matar Israil, ieh ineh Tuhan luk Melalud. “Ui ini luk pun-pun, idi Ui ini luk kekiped. Ui sebuleng mo' luk Allah.

⁷ Idéké luk miak nganau' luk inau'Ku, idi luk miak mada' luk mangun muci, ieh ineh rat pun-pun macing kekipedneh?

⁸ O pupuKu, aleg muyuh matot! Muyuh kali' rat mon macing nekini, Ui nemada' atun ratnan luk mangun muci, idi muyuh ineh lun nekali' Negku! Inanké Allah luk baken? Sebuleng pana' nateh luk kali'Ku. Na luk idi Batu luk baken.”

Akang-Akang Inan Situnga

⁹ Amung lemulun luk nganau' akang na mayu, idi allah-allah luk uendeh ngedita' pana'na ulek. Lemulun luk sembayang inan allah ineh mebuser idi dat ileh — idi ideh miak uen ngigu'.

¹⁰ Na ulek ngurai aceh akang luk inan sembayang mepad kudeng aceh allah!

¹¹ Idé-idé luk sembayang neneh uen ngigu'. Ideh ineh luk nganau' akang lemulun mo'. Nima nedeh tetunin bang besara' — kali' rungen ideh pelaba tot idi uen ngigu'.

¹² Lun luk mileh nuno ngalap belawan idi nganau' neneh luun apui. Ieh nuno belawan ineh ku ticu'neh luk metueh pad nganau' luk pianneh. Idi ieh luk melau, meparing, idi merur.

¹³ Lun ngakem kayuh nari kayuheh. Ieh ngabar aceh luk kudeng ayu akang ku kapur, idi ngarit ineh ku repapehneh. Ieh nganau' aceh ayu lemulun luk do' taga luk miak ruen bang ruma' sembayang.

¹⁴ Ieh nebpeng tumuh, kayuh luk meraben, kian tongor lek. Ieh nibu aceh lawa tumuh lek idi nganét udan mubpur neneh.

¹⁵ Sebabpat kayuh mangun ku kayuh apui idi sebabpat ruen ku akang. Sebabpat kayuh ruen ku apui luk inan singidu idi ku nganau' ruti. Idi teh sebabpat luk baken ruenneh ku aceh allah inanneh sembayang!

¹⁶ Sebuang kayuh ineh ruenneh ku apui, ku ngeseb uang pung luk kenenneh, pad ieh mebor. Ieh singidu, kebalaneh, “Pelaba do' lau'! Do' apui ini!”

¹⁷ Kayuh luk ketecan ineh ruenneh ku aceh akang inanneh tekeradung idi sembayang. Kesembayangneh, “Iko ineh allahku. Do' ngulun negku!”

¹⁸ Lemulun luk kudeng ineh palaba bacé, idi na kali' luk ruendeh. Ideh rudap mateh idi ngitek terawédeh pad na kali' luk matu.

¹⁹ Lemulun luk nganau' akang na petap ieh pebala, “Sebuang kayuh isebku, idi ui nenganau' ruti luun bareh apui ineh, idi nengeseb uang pung idi nekuman ineh. Kayuh luk neketecan ineh inau'ku ku aceh akang. Idi nekini ui tekeradung pa atun aceh tangal kayuh!”

²⁰ Lun mebacé luk sinaluk ineh kuman abuh; idi na miak muit bururneh dengan pebala, “Akang luk bang paladku mebalih mo'.”

Tuhan Luk Mudut Idi Lun Nengulun

²¹ Kebala Tuhan, “O Israil, ngerawé bala ini; iko ineh demulunKu. Ui nemudut namu ku demulunKu, idi na tu Ui mekelupan namu.

²² Ui nemalid amung sala' muyuh, mepad kudeng laput. Lumi amé' Negku; Ui ini Lun Nengulun namu.”

²³ O amung langit, ngitang mawang niat! O tana' luk pa liang do' ngitang! O pegkung idi kayuh luk bang pulung, do' ngitang mawang niat! Tuhan nengulun pupuNeh Israil idi nengegala' rayehNeh.

²⁴ “Ui ini Tuhan luk nemudut idi nenguli' namu. Ui ini Tuhan luk nemudut luk amung-amung, Ui ini mo' luk nemalad langit. Kareb Ui nemudut tana' ini na lun nengedengan Negku.

²⁵ Ui ngegala' saluk lun luk mangun, idi ngena bada' lun luk nier gituen. Ui ngena bala lun luk mileh, idi ngegala' ilehdeh ineh luk mebacé.

²⁶ Iamo' kareb demulunKu mada' luk mangun muci, idi lun dukenKu ngegala' terawéKu, idi Ui ngacing terawé idi bada' ineh. KebalaKu kuan Yerusalim, lemulun miak tudo su ineh; idi kuan amung bawang Yahuda, ideh miak piduten baruh ratnan usag ineh.

²⁷ Dengan sebuleng ecuk, Ui ngekeket abpa' rayeh.

²⁸ KebalaKu ni Kores, “Iko ineh lun ngimet kuanKu; iko miak nganau' luk pianKu; iko miak ngecuk mudut Yerusalim baruh, idi nganau' apin Ruma' Allah pana'.’ ”