YESAYA 43 - BALA LUK DO'

Allah Ngulun PupuNeh

¹ O Israil, kebala Tuhan luk nemudut namu, “Aleg matot — Ui matar namu. Ui neneten ngadanmu. Iko Ui kuan.

² Kareb iko guta abpa' luk medalem, Ui idi denganmu pad susa' na ngelaya' namu. Sagan tu pana' iko nalan bang apui, na iko melau'. Susa' luk rayeh pana' na ngedereh namu.

³ Ngaceku Ui ini Tuhan Allahmu, Ieh ineh Allah Israil luk meligan luk ngulun namu. Ui maré Masir pad muit namu; dengan Sudan idi Seba pana'.

⁴ Ui maré tuda'-tuda' pupu pad ngulun namu, ngaceku iko pelaba do' kali'Ku, idi Ui mawa namu idi ngedita' namu.

⁵ Aleg iko matot. Ui idi denganmu! “Rat mado pa busat aco idi pa acep aco Ui nguit pupumu muli'.

⁶ Ui ngecuk pa tinueh busat aco muit nedeh, idi ngecuk pa kabing busat aco na ngimet nedeh. Nima' pupuKu muli' rat bawang luk mado, rat aput-aput tana' pana'.

⁷ Ideh ineh pupuKu sebuleng luk pinudutKu pelé ngacing rayeh kuanKu.”

Israil Ineh lun Nekali' Tuhan

⁸ Kebala Allah, “Do' nguit pupuKu amé' besara'. Ideh inan mateh, iamo' ideh mebuser; Ideh inan lalid, iamo' ideh mebengel!

⁹ Do' nguit amung pupu baken amé' besara'. Idéké rat arang allah-allahdeh kali' luk mangun muci? Idéké rat arangdeh nemada' ratnan luk mangun nekini? Nima' allah-allah ini nguit lun nekali' nedeh, pad ngegala' nedeh matu, idi mada' kudeng baladeh matu.

¹⁰ “O lun Israil, muyuh ineh lun nekali' Negku, idi pupu luk pinili'Ku ku demulunKu, pelé muyuh ngiti Negku idi manu Negku, na luk idi atun, idi teh na luk idi muci.

¹¹ “Ui ini mo' luk Tuhan. Ui ini mo' luk ngulun nemuyuh.

¹² Ui nemada' atun ratnan luk miak mangun, idi Ui nengedengan nemuyuh. Allah pupu baken na tu nenganau' kudeng ineh; muyuh ineh lun nekali' Negku.

¹³ Ui ini Allah macing ruked-ruked. Luk inimet ticu'Ku na miak uen lun ngaro. Luk inau'Ku na miak uen lun ngisu'.

Israil Puatin Allah Rat Babil

¹⁴ Kebala Tuhan, Allah Israil luk meligan luk ngulun nemuyuh, “Ui ngecuk aceh baweh amé' munu' Babil, pelé Ui ngulun nemuyuh. Ui ngusag amung tanga' bawang, pad arod pupu ineh misu' ku tangi'.

¹⁵ Ui ini Tuhan Allah muyuh luk meligan. O lun Israil, Ui nemudut nemuyuh, idi Ui ini raca' muyuh.”

¹⁶ Bang kareb luk mon, Tuhan nenganau' aceh dalan, maya' abpa' rayeh luk meribuer.

¹⁷ Ieh nengacing usag kuan aceh baweh keréta idi kuda luk pelaba rayeh. Ideh neluka' pad na miak tumui teh, idi naté mepad kudeng dian luk nekilep!

¹⁸ Iamo' kebala Tuhan, “Aleg muyuh megéi' ngerawé luk nangun bang kareb luk mon.

¹⁹ Nginulat luk ruenKu luk mebaruh. Nekini ieh melagan idi miak siren muyuh! Ui nganau' aceh dalan maya' su luk ali-ali idi maré bued abpa' kuan muyuh su ineh.

²⁰ Pung luk meliput pana' miak ngubur Negku dengan bungalé idi suit luk necan terurdeh, kareb Ui nganau' abpa' manud déi' su luk ali-ali, pad maré abpa' rupen pupu luk pinili'Ku.

²¹ Ideh ineh pupu luk inau'Ku kuan bururKu sebuleng, luk miak menani ngubur Negku!”

Sala' Israil

²² Kebala Tuhan, “Iamo'na iko nenawar Negku; O Israil, iko melibo sembayang Negku.

²³ Iko na nemaré dumba ku baré sabpen kuanKu, iko na nengubur Negku ku barému. Ui na nemutuh baré idi umau luk do' buen pad iko musam.

²⁴ Iko na nemelih umau luk do' buen kuanKu, idi nengebor Negku ku lemak aya'mu. Iamo' iko nengesusa' Negku ku sala'mu, idi nengerur Negku ku kekamenmu luk dat.

²⁵ Iamo' Ui ini Allah luk ngiu' amung sala'mu, ngaceku ineh luk pianKu. Idi teh Ui na ngerawé sala'mu ineh.

²⁶ “Do' tau amé' besara', idi pegayam. Mada' luk kikemmu pad ngegala' sirimu!

²⁷ Tepunmu luk pun-pun nenganau' sala'; lun rayeh-rayehmu pana' mesala' pa kiungKu.

²⁸ Lun luk ngimet namu nengelutak su inanKu luk meligan, pad Ui ngacing usag kuan Israil, Ui nenima' pupuKu sebuleng uen ngedat.”