YESAYA 42 - BALA LUK DO'

Demulun Tuhan

¹ Kebala Tuhan, “Ini DemulunKu luk uenKu ngetueh — Lun luk pinili'Ku luk inanKu mawang niat. Ui nemanu' Neneh ku laludKu; Ieh ngacing luk mesiri kuan amung pupu.

² Ieh na ngitang idi na mada' rayeh arod iring dalan pana'.

³ Na Ieh sikal mutut bulu' luk pekuyut, idi ngilep sesakan luk uned mulun. Ieh ngacing ukum luk mesiri kuan amung lemulun.

⁴ Rapet idi kuu'Neh na miak misu'; idi Ieh ngeletep luk mesiri luun tana' ini. Idi bawang luk mado nginulat bada'Neh.”

⁵ Allah nemudut langit idi nemalad ineh; Ieh nemudut tana' ini idi amung luk mulun su ineh Ieh nemaré ulun idi niat kuan amung lemulun. Idi kebala Tuhan Allah kuan demulunNeh,

⁶ “Ui ini Tuhan, nenawar Namu idi nemaré lalud Namu, pelé ngacing luk mesiri luun tana' ini. Ui maré Namu kudeng aceh pejani' kuan amung lemulun, pad mangun ku acang kuan amung pupu.

⁷ Iko miak ngalat mateh lun luk nebuser, idi muit lemulun rat bang tutup luk medacem.

⁸ “Ui ini mo' Tuhan Allah muyuh. RayehKu na barén kuan allah baken; idi uburKu na miak barén kuan akang.

⁹ Amung luk bilaKu atun pangeh icing. Nekini Ui mada' ratnan luk mebaruh, kareb nateh amung ineh mangun.”

Nani Ubur

¹⁰ Nani aceh nani luk mebaruh kuan Tuhan, O amung tana' ini, ngubur Neneh dengan nani ini. O muyuh luk maya' kapal luun abpa' rayeh, ngubur Neneh, dengan amung luk mulun bang abpa' rayeh pana'; idi teh bawang luk mado idi lun luk tudo su ineh!

¹¹ Do' su luk ali-ali idi bawang su ineh ngubur Allah, idi amung lun Kedar pana'. Do' lun Sela menani mawang niat idi ngitang rat luun pegkung.

¹² Do' lemulun luk tudo déi' bawang luk mado ngubur idi ngerayeh Tuhan.

¹³ Tuhan amé' pebunu' mepad kudeng lun luk mesangit. Ieh temina' ku gateh idi tueh pana'. Ieh ngarod idi nateg tawak; Ieh ngegala' laludNeh pa kiung bunu'Neh.

Allah Pejani' Ngedengan PupuNeh

¹⁴ Kebala Allah, “Pelaba io Ui ungeng idi na nengor bala pupuKu. Iamo' nekini Ui ngeruat usehKu. Ui ngarod mepad kudeng decur luk mét nenganak.

¹⁵ Ui ngusag surud idi pegkung, idi nganau' uduh idi kayuh tekering. Ui ngisu' raked mangun ku su luk ali-ali, idi ngekeket amung takung.

¹⁶ “Ui nguyut pupuKu luk mebuser, maya' dalan luk na nedalandeh. Ui ngisu' dacemdeh mangun ku acang, idi ngebalad tana' luk metekura'. Kali' rungen Ui nganau' luk kudeng ineh.

¹⁷ Amung lemulun luk merapet ku akang idi neten akang ineh allahdeh, miak uen ngigu'.”

Israil Na Ninger

¹⁸ Kebala Tuhan, “O muyuh lun luk mebengel, do' ninger! idi muyuh lun luk mebuser, nier do'-do'!

¹⁹ Idéké luk meluun buser ratnan demulunKu, idi meluun bengel ratnan lun dukenKu?

²⁰ O Israil, mula' luk siniermu, iamo' na tu ulekneh kuanmu. Iko inan lalid luk ku ninger, iamo' anunké luk pindengermu?”

²¹ Tuhan ineh Allah luk geregan ngulun, ineh punneh Ieh pian ku bada'Neh buren.

²² Iamo' pupuNeh pangeh inaro idi tiban. Ideh nekaneh abpung idi inau' bang tutup. Idi kareb ideh inaro, seburur pana' nateh luk nengedengan nedeh.

²³ Pianké muyuh ninger bala ini? Miakké muyuh ninger do'-do' nekini?

²⁴ Idéké nemaré Israil kuan lun luk ngaro ineh? Ieh ineh Tuhan sebuleng, ngaceku sala' tau pa kiungNeh! Tau na tu mulun maya' pianNeh, idi tau na nemaya' bada'Neh.

²⁵ Idi Ieh nengacing tueh usehNeh netau, dengan amung dereh pebunu'. Apui usehNeh mulun aput-aput Israil, iamo' na tau nekali' luk mangun, idi na tau nesibada' ratnan amung luk mangun ineh.