YESAYA 41 - BALA LUK DO'

Ubuk Allah Kuan Israil

¹ Kebala Allah, “O bawang luk mado, do' pirud idi ninger balaKu! Do' muyuh temina' pebala bang besara'. Muyuh inan kareb pebala. Do' tau mepamung, pad tau kali' idé luk matu.

² “Idéké nenguit lun luk metueh rat pa busat aco? Idéké luk nganau' neneh metueh bang amung lawéneh? Idéké luk nganau' neneh metueh ratnan amung raca' idi pupu? Ideh dedaten ku pelapetneh mepad kudeng abuh, idi uen ngatad ku ilebneh mepad kudeng uduh luk tekering mepalid ku bui!

³ Ieh ngerada' nedeh idi petacu nalan, Ieh pelaba awer, pad kukudneh na mepisit luun tana'.

⁴ Idéké luk nengacing ineh? Idéké nengeletep luk mangun ineh? Ui ini Tuhan idi rat pun-pun, idi Ui ini, Tuhan Allah idi macing kekipedneh.

⁵ “Pupu rat bawang mado pangeh nenier luk inau'Ku; ideh matot idi megegker. Ngaceku ineh ideh mepamung.

⁶ Lemulun luk mileh ngakem makai ticu' miak ngedengan idi ngubuk nelun baken.

⁷ Kebala lun luk ngakem kayuh kuan lun luk tukang amas, ‘Do' ineh!’ Lun luk nuno akang pad ieh mesalud, ngubuk lemulun luk maku' neneh. Kebala seburur, ‘Amut ineh do',’ — idi ideh maku' akang su luk inanneh ineh.

⁸ “Iamo' iko demulunKu Israil, pupu luk pinili'Ku idi inul rurumKu Ibrahim.

⁹ Ui nenguit namu rat iring tana' idi nawar namu rat bawang luk meluun ado, kebalaKu, ‘Iko ineh demulunKu.’ Ui na nenala' namu, iamo' Ui nemili' namu.

¹⁰ Aleg iko matot — Ui idi denganmu. Ui ini Allahmu, aleg iko merapang. Ui ngetueh namu idi ngedengan namu. Ui matar idi ngulun namu.

¹¹ O pupuKu, lemulun luk museh namu, miak uen ngigu' idi uen ngedat. Lemulun luk munu' namu miak maté;

¹² lemulun luk munu' namu na idi luun tana' ini muci.

¹³ Ui ini Tuhan Allahmu; Ui ngetueh namu, kebalaKu, ‘Aleg iko matot; Ui ngedengan namu.’ ”

¹⁴ Kebala Tuhan, “O Israil, sagan tu pana' iko isuut idi melaya', aleg iko matot; Ui ngedengan namu. Ui ini Allah Israil luk meligan luk ngulun namu.

¹⁵ Ui nganau' namu mepad kudeng luk inan rumik, luk mebaruh, luk metadem idi inan lipen. Iko miak rumik pegkung idi ngusag nedeh; surud-surud pana' mekareg mangun ku abuh.

¹⁶ Iko ngelalu' nedeh arang gawa'; idi ideh mepalid ku bui. Iamo' iko miak mawang niat; ngaceku Ui ini Allahmu. Iko miak ngubur Negku, Allah Israil luk meligan ineh.

¹⁷ “Kareb pupuKu medereh nakap abpa', kareb telanandeh metekering ku paring Ui ini Tuhan miak ngua' sembayangdeh. Ui ini Allah lun Israil na tu miak necan nedeh.

¹⁸ Ui nganau' tuda'-tuda' abpa' manud, luun surud luk tekering, idi bued abpa' miak remuat bang ruan. Ui ngisu' su luk ali-ali mangun ku takung idi tana' luk tekering mangun ku bued abpa'.

¹⁹ Ui nganau' tumuh mulun déi' su luk ali-ali, idi teh kayuh pirur, hadas, idi saitun. Kayuh miak mulun luun tana' luk metugeh, ieh ineh tongor, aru', idi peribu pana'.

²⁰ Lemulun miak nier ineh idi kali', Ui ini Tuhan pangeh nenganau' ineh. Muci ideh miak kali', Allah Israil luk meligan nenganau' amung ineh.”

Bada' Tuhan Ratnan Allah-Allah Luk Mebalih

²¹ Kebala Tuhan, raca' Israil, “O allah-allah pupu baken, do' ngukab besara' idi mada' terawé muyuh luk tu-tu!

²² Amé' tungé' idi mada' ratnan luk miak mangun. Idi teh ngelio su luk inan besara', ratnan luk pangeh nangun idi kekipedneh.

²³ Mada' nekai ratnan luk mangun muci, idi teh kai kali' muyuh ineh allah-allah! Nganau' luk do, ngacing aceh susa', pad kai mawa idi matot!

²⁴ Muyuh sebuleng idi amung kekamen muyuh na anun-anun, idi lemulun luk sembayang nemuyuh inan megani'!

²⁵ “Ui nemili' seburur lemulun luk tudo pa busat aco; Ui nguit neneh muhu' rat pa busat aco. Ieh ngeradu' raca'-raca' ayu-ayudeh kudeng tana'. Mepad kudeng lun luk mipi' kudeng ngeradu' tana' salit.

²⁶ Idéké rat arang muyuh nemada' nekai atun ratnan luk miak mangun ineh pad kai pebala muyuh matu? Seburur pana' rat arang muyuh nateh luk nepebala kudeng ineh, idi na luk pindenger lun.

²⁷ Ui ini Tuhan luk pun-pun nemada' bala ineh kuan Sion. Ui nengecuk lun duken amé' mada' Yerusalim, kebalaneh, ‘Pupumu muli'.’

²⁸ Kareb Ui nenier allah-allah seburur pana' nateh luk nepebala, seburur pana' nateh luk ngor balaKu.

²⁹ Allah-allah ini na ulekdeh; ideh na miak nganau' anun-anun — amung akangdeh melaya' idi na melalud!”