YESAYA 40 - BALA LUK DO'

Bala Luk Inan Merapet

¹ Kebala Allah muyuh, “Do' muyuh ngubuk pupuKu!

² Ngubuk nelun Yerusalim. Do' mada' nedeh, nekini ideh petap dereh, idi Ui maré do' ratnan sala'deh. UkumKu nedeh ngaceku sala'deh pangeh petap.”

³ Inan lemulun luk ngitang, “Nganau' aceh dalan déi' su luk ali-ali kuan Tuhan idi Allah tau!

⁴ Amung ruan miak uen manu', idi amung pegkung miak uen ngeraked. Surud-surud mangun ku raked, idi tana' luk metekura' mangun mebalad.

⁵ Idi rayeh Tuhan miak uen ngegala', pad siren amung lemulun. Amung ineh pangeh pijani' Tuhan.”

⁶ Inan lemulun luk ngitang, “Do' mada'!” Kebalaku, “Anunké luk badénku?” “Mada' ratnan lemulun mepad kudeng uduh; idi na mulun mio mepad kudeng busak bunga'.

⁷ Uduh idi busak melayuh, kareb Tuhan malid nedeh ku bui. Idi lemulun na meluun tueh ratnan uduh!

⁸ Sagan pana' uduh idi busak melayuh, iamo' bala Allah tau meraben!”

⁹ O Yerusalim, amé' luun pegkung luk medita', idi mada' bala luk do'! O Sion do' iko ngitang, idi mada' bala luk do'! Aleg matot pebala. Mada' amung bawang Yahuda ratnan acing Allahdeh!

¹⁰ Tuhan macing pad ngimet dengan lalud, idi Ieh nguit lemulun luk pinuitNeh.

¹¹ Ieh matar pupuNeh mepad kudeng lun luk matar dumba; Ieh ngamung anak dumbaNeh, idi ngabin nedeh; idi teh Ieh nguyut tinandeh ulai-ulai.

Allah Israil Luk Na Miak Uen Maad

¹² Miakké abpa' rayeh tarin ku ragem? Miakké langit tarin ku urek? Miakké amung abuh tana' ini ruen bang aceh sangkir? Miakké pegkung idi surud uen nimang?

¹³ Miakké lemulun ngecuk Tuhan nganau' anun-anun? Idéké miak mada' Neneh?

¹⁴ Idéké luk tunin Allah, pad Ieh mileh idi do' kali', pelé Ieh sibada' ngakem?

¹⁵ Pa kiung Tuhan amung pupu na anun-anun; ideh na meluun ratnan aceh tapek abpa'; pulau luk mado meran mepad kudeng abuh.

¹⁶ Amung pung bang pulung Lebanon na petap ku aceh baré kuan Allah tau. Idi amung kayuh luun pulung ineh na petap ku kayuh apui!

¹⁷ Pa kiungNeh amung pupu na anun-anun.

¹⁸ Idéké luk miak uen maad dengan Allah? Kudeng apehké muyuh miak mada' ayuNeh?

¹⁹ Na Ieh kudeng aceh akang luk inau' lemulun, luk kikep lun ku amas, idi luk inau' luun pirak pana'.

²⁰ Lun masi' luk na miak melih pirak idi amas, mili' kayuh luk na merapuk. Ieh nakap aceh lun luk mileh luk miak nganau' aceh akang luk na metabpa.

²¹ Naké muyuh kali'? Naké muyuh neninger? Naké muyuh bida' mon? Naké muyuh neninger ratnan lawé tana' ini pinudut?

²² Ieh pinudut Raca' luk tudo luun kerusiNeh, pa luun tana' idi pa luun langit pana'. Lemulun luk luun tana' mepad kudeng dara'! Ieh nemalad langit mepad kudeng dicing, mepad kudeng lepo kibung luk inan lemulun tudo.

²³ Ieh ngebeneh raca' luk melalud, pad ideh na anun-anun.

²⁴ Ideh mepad kudeng tibu luk mebaruh, luk nateh nepetuneb. Kareb Tuhan maré bui, ideh melayuh, idi mepalid mepad kudeng uduh luk tekering.

²⁵ Idéké luk miak uen maad dengan Allah luk meligan? Inanké lun baken luk mepad kudeng Ieh?

²⁶ Do' nier déi' langit! Idéké nemudut gituen luk siren muyuh? Ieh ineh luk nenguyut nedeh mepad kudeng aceh baweh. Ieh kali' kinula'deh idi neten ngadandeh! Ieh pelaba lalud — sebuleng gituen pana' na metutu'!

²⁷ O Israil, ngudehké iko ngedureng idi ngerawé Tuhan na kali' susa'mu idi na nganau' luk petulu kuanmu?

²⁸ Naké iko kali'? Naké iko neninger? Tuhan ineh Allah luk meruked, Ieh nemudut amung tana', Ieh na miak merur idi melaya'. Seburur pana' nateh luk kali' terawéNeh.

²⁹ Ieh ngetueh lemulun luk melaya' idi merur.

³⁰ Anak-anak pana' miak melaya' idi merur, idi anak adi' metebaceng ku laya'deh.

³¹ Iamo' idé-idé luk merapet ku Tuhan ngedengan nedeh, miak uen ngetueh baruh. Ideh kemikit dengan ilad mepad kudeng kanui. Kareb ideh upun, na ideh merur; kareb ideh nalan pana' na ideh melaya'.