YESAYA 39 - BALA LUK DO'

Lun Duken Rat Babil

¹ Bang kareb ineh teh Merodak Baladan, raca' Babil nemaré surat idi baré kuan Raca' Hesekia, ngaceku ieh nekali' Raca' Hesekia mét.

² Idi Hesekia nenganak lun luk duken ineh, idi nemada' sirendeh amung binawehneh, ieh ineh amas idi pirak, remumu' umau luk do' buen, idi teh repapeh pebunu'. Idi bang ruma'neh idi bang aput imetneh, sebuleng pana' nateh luk na bida' Raca' Hesekia nedeh.

³ Idi Nabi Yesaya iné' ni Raca' Hesekia, idi nengitun neneh, “Anun luk bila lun ini? Idi rat iapeh ideh?” Kebala Hesekia, “Ideh nacing rat bawang luk mado, ieh ineh Babil.”

⁴ Idi kebala Yesaya, “Anun luk sinierdeh bang ruma'mu?” Idi kebala Hesekia, “Ideh pangeh nenier amung luk bang ruma'ku. Sebuleng pana' luk bang amung takepku nateh luk na bida'ku nedeh.”

⁵ Idi kebala Yesaya inan Raca' Hesekia, “Do' iko ninger bala Tuhan luk Melalud:

⁶ Muci aco amung-amung binawehmu idi binaweh tepunmu luk pangeh dinug macing aco sini, miak iten amé' déi' Babil. Sebuleng pana' na miak ketecan.

⁷ Idi inul bururmu sebuleng miak tebanen idi uen mani' pad ideh mangun ku demulun Raca' Babil.”

⁸ Idi kebala Hesekia ni Yesaya, “Petulu bala Tuhan luk bilamu ineh, ngaceku inan do' idi awang ruked ulunku.”