YESAYA 38 - BALA LUK DO'

Hesekia Dino' Ratnan Etneh

¹ Kareb ineh Hesekia mebura' ét lélé maté. Idi Nabi Yesaya Amos iné' neneh, kebalaneh, “Kudeng ini bala Tuhan: Periteteng iko kuan uang tetek ruma'mu, ngaceku iko lélé maté. Ngaceku na ét mini amé' do'.”

² Idi Hesekia nesemium pa alad, idi nesembayang mutuh Tuhan, keputuhneh,

³ “O Tuhan, do' Iko ngerawé ratnan ui pangeh nenalan pa kiungMu dengan amung do' idi letep niatku. Idi pangeh ui nenganau' luk matu pa kiungMu.” Idi ieh pelaba tangi'.

⁴ Idi kebala Tuhan ni Yesaya,

⁵ “Kudeng ini bala Tuhan tepun muyuh Daud: Pangeh Ui neninger sembayangmu. Idi pangeh Ui kali' abpa' matehmu. Idi ui miak ngekadang ulunmu pulu' limeh lak baruh.

⁶ Ui miak muit namu idi bawang Yerusalim rat bang palad raca' Asur idi Ui na ugka' nginita bawang ini.”

⁷ Idi ini tanu' luk barén Tuhan namu, ratnan Ieh ngacing jani'Neh namu.

⁸ Idi Tuhan miak ngelubed aca amé' pulu' ngakang pa puet luun luk ku etu lawé aco luk inau' Akas. Idi Tuhan nengelubed aca' ineh amé' pulu' ngakang.

⁹ Kareb Hesekia nedo' ratnan étneh, idi ieh nengayud nani ubur ini:

¹⁰ Ui nengerawé kareb ui mulun do', idi ui amé' su luk inan até, idi na mulun macing nan tarekku.

¹¹ Ui nengerawé ui na miak nier Tuhan idi lemulun teh, bang tana' su luk inan lemulun tudo.

¹² Ulunku inau' mekamu', mepad kudeng lepo kibung luk tika, Ui nengelulun ulunku mepad kudeng nangal kén lun luk ngebaruh, ratnan su luk inanneh ngebaruh. Ui nengerawé Allah nemangeh ulunku.

¹³ Kedangan-kedangan ui nengarod ku étku, idi nengerawé Allah nemangeh ulunku, mepad kudeng aceh balang luk nemutul tulangku.

¹⁴ Arodku isuut idi melaya', idi mepad kudeng uni sukur. Matehku melaya' nier déi' langit. O Tuhan, muit negku ratnan amung susa' ini.

¹⁵ Anunké luk miak balénku? Tuhan pangeh nenganau' ini. Niatku mesusa' pad ui na medacep mateh.

¹⁶ O Tuhan, ui miak mulun kuanmu sebuleng. Ngedo' negku idi nima' negku mulun.

¹⁷ Susa' niatku miak misu' ku awang. Iko ngulun negku ratnan amung dereh; Iko maré do' ratnan amung sala'ku.

¹⁸ Seburur pana' nateh luk miak ngubur Namu bang su luk inan até. Lun luk naté na miak merapet ku siriMu.

¹⁹ Lun luk mulun ngubur Namu, mepad kudeng ui ngubur Namu nekini. Amung taman mada' anakdeh ratnan siriMu.

²⁰ O Tuhan, Iko nengedo' negku! Kai nateg gita idi menani ngubur Namu, bang ruma'Mu ruked ulun kai.

²¹ Idi kebala Yesaya, “Do' muyuh ngalap sengapil bua' gita' idi ngerareng ineh luun kimuh raca' pad ieh do'.”

²² Idi teh Hesekia pangeh nepebala, “Anunké tanu' luk ngegala' ratnan ui miak umak idi semuet bang ruma' Tuhan teh?”