YESAYA 37 - BALA LUK DO'

Raca' Hesekia Mutuh Badén Yesaya

¹ Kareb Raca' Hesekia neninger baladeh, ieh nengerarak ayungneh ku susa' niatneh. Idi ieh nenacung idi iné' bang Ruma' Tuhan.

² Ieh nengecuk ni Eliakim, lun rayeh lun luk ngasa' ruma' raca', Sebna, lun luk ngayud kuan raca', idi imam-imam luk mengered amé' papu' Nabi Yesaya Amos. Ideh pana' nenacung.

³ Kebaladeh ni Yesaya, “Kudeng ini bala Hesekia, ‘Aco sini, ieh ineh aco dereh; tau bida' idi inigu'. Tau mepad kudeng decur luk malé nenganak, iamo' ieh pelaba laya' pad anak na mebpeh.

⁴ Raca' Asur pangeh nengecuk lun rayehneh iné' ngedat Allah luk mulun. Do' Tuhan Allahmu ninger bala luk dat ini idi ngukum lemulun luk nepebala kudeng ini. Do' iko sembayang nan Allah mutuh kuan pupu tau luk ketecan.’ ”

⁵ Kareb Yesaya nekali' bala Raca' Hesekia,

⁶ idi ieh nengelubed bala ineh: “Kudeng ini bala Tuhan: Aleg muyuh megagau ku bala lun Asur luk nengedat Negku.

⁷ Ui miak nganau' raca' ninger aceh bala, pelé ieh muli' idi pitayen bang bawangneh sebuleng.”

Lun Asur Periteteng Nan Yerusalim Sekua' Teh

⁸ Kareb lun rayeh rat Asur ineh neninger bala ratnan raca' Asur pangeh nenalan rat Lakis idi pebunu' muneng ku bawang Libna, idi ieh iné' ngitun neneh.

⁹ Ngaceku raca' Asur pangeh neninger bala ratnan Tirhaka, raca' Sudan luk amé' pebunu' neneh. Idi kareb ieh neninger bala ineh, idi ieh nemaré aceh surat kuan Hesekia, kebalaneh,

¹⁰ “Allah luk inan Hesekia raca' Yahuda merapet, nepejani' na maré Yerusalim bang palad raca' Asur. Iamo' aleg iko saluken ku bala ineh.

¹¹ Iko pangeh neninger luk inau' raca' Asur kuan amung bawang luk pian uenneh ngusag. Miakké iko mepuit?

¹² Tepunku nengusag bawang Gosan, haran, idi Resep, idi nengaté nelun Bait Eden luk tudo déi' Telasar, idi seburur pana' rat arang allahdeh nateh luk miak ngulun nedeh.

¹³ Iapehké raca'-raca' bawang Hamat, Arpad, Sepawaim, Hina, idi Iwa?”

¹⁴ Raca' Hesekia nengalap surat rat nelun duken ineh idi ieh nemaca' ineh. Idi ieh iné' bang Ruma' Allah, idi nengerareng surat ineh pa kiung Tuhan,

¹⁵ kesembayangneh,

¹⁶ “O Tuhan luk Melalud, Allah lun Israil, luk tudo luun kerusiMu, Iko mo' Allah luk Sebuleng. Idi Iko luk pa luun amung imet bang tana' ini. Iko luk nemudut tana' idi langit.

¹⁷ O Tuhan, nier nekai idi ninger bala kai. Ninger amung luk belén Senakerib, raca' Asur luk ngedat Namu, ieh ineh Allah luk Mulun.

¹⁸ O Tuhan, kai kali' raca'-raca' Asur pangeh nengusag mula' imet pad bawangdeh mangun ku su luk ali-ali.

¹⁹ Idi ideh nengeseb akangdeh, luk baken allah luk matu, iamo' amung ineh pinudut lemulun, ratnan kayuh idi batu.

²⁰ O Tuhan Allah kai, muit nekai rat nelun Asur, pelé amung raca' aput tana' kali' Iko mo' Allah luk matu.”

Bala Yesaya Kuan Raca' Hesekia

²¹ Idi lun duken Yesaya icukneh nated bala kuan Raca' Hesekia ratnan or Tuhan kuan sembayangneh.

²² Kebala Tuhan, “O Senakerib, bawang Yerusalim meriruh idi situnga namu.

²³ Idéké luk inanmu nesitunga idi luk inau'mu ngedat? Iko nengedat Negku, ieh ineh Allah Israil luk Meligan.

²⁴ Iko nengecuk lun dukenmu nguto Negku, kebalamu, ‘Dengan amung kerétaku, ui nuké pegkung luk medita' pad macing punang arur déi' Lebanon, idi ui nenebpeng amung tumuh luk medita', idi amung tongor luk meluun do'. Idi ui pangeh nacing bang pulung kara luk mado.

²⁵ Ui pangeh nengukat subuk idi nengirup abpa' bang bawang baken. Bawehku pangeh nengeket amung abpa' Masir ku dapardeh.’

²⁶ “Naké iko kali', idi Ui pangeh nengeletep amung ini rat mon? Idi nekini Ui pangeh nengacing amung ineh. Ui luk nemaré lalud namu, pad iko nenabpa amung libung bawang luk meraben, pelé bawang ineh mangun ku tuda'-tuda' bubpun batu mo'.

²⁷ Idi amung lun bang bawang ineh melaya' peh, pad ideh negagap idi migu' teh. Ideh mepad kudeng luk tinibu nan lati', idi teh kudeng uduh luk mulun luun apo, luk nelayuh ku bui luk melau' rat pa busat aco.

²⁸ “Ui kali' kareb iko tumui idi kareb iko tudo, kareb iko remuat, idi kareb iko semuet. Idi teh Ui kali' gateh niatmu Negku.

²⁹ Ui kali' gateh niat idi dita' niatmu Negku. Ngaceku ineh Ui nganau' kinar luun icungmu idi belawan bang tangmu. Idi Ui nated namu lemubed maya' dalan luk nedalanmu iné' tungé' atun.”

³⁰ Idi kebala Yesaya nan Raca' Hesekia, “Ini aceh tanu' ratnan luk miak mangun. Bang lak ini idi lak baruh muyuh miak kuman bua' atab tibu muyuh. Iamo' bang lak sedéi' muyuh miak nibu idi ngeranih, idi nibu anggur, idi kuman bua'deh.

³¹ Ngaceku lun pupu Yahuda luk neketecan ineh miak inan uat pa liang tana', pad ideh ngeruat bua' luk do'.

³² Rat Yerusalim idi rat Pegkung Sion inan teh lun luk ketecan, ngaceku Tuhan luk Melalud nganau' ineh.”

³³ Kudeng ini bala Tuhan ratnan raca' Asur ineh: “Na tu-tu ieh miak semuet bang bawang ini, idi ngelatik sebuleng ileb binorneh pana'. Idi na ieh miak ngerieng bawang ini ku utap. Idi na ieh miak nganau' aceh dalan umak amé' luun libung batu ineh.

³⁴ Idi teh ieh miak lemubed maya' dalan luk nedalanneh atun. Iamo' na ieh miak semuet bang bawang ini. Ui ini Tuhan pangeh nepebala.

³⁵ Ui miak ngelibung idi matar bawang ini ngaceku ngadanKu, idi ngaceku jani'Ku nan demulunKu Daud.”

³⁶ Melaikat Tuhan iné' su luk inan baweh Asur nelupo idi nengaté 185,000 lun pebunu'. Kareb masat aco amung butungdeh miak siren lun luun natad.

³⁷ Idi Senakerib raca' Asur neburo idi nuli' iné' Nineweh.

³⁸ Bang seaco, kareb ieh sembayang bang ruma' akangneh, Nisrok, dueh anakneh, Adramalek idi Sarisar, nengaté neneh. Idi didueh neburo iné' tana' Ararat. Idi anakneh luk baken, ieh ineh Esarhadon nengelibal neneh mangun ku raca'.