YESAYA 35 - BALA LUK DO'

Dalan Macing Inan Luk Meligan

¹ Su luk ali-ali mawang niat, idi busak mulun luun tana' payeh.

² Su luk ali-ali meluun taga ratnan Pegkung Lebanon, idi mepad baleng kudeng tana' Karmel idi Saron; ieh ngitang idi menani ku awang niatneh. Amung lemulun miak nier ubur Allah, dengan rayeh idi laludNeh.

³ Ngetueh ticu' luk merur, idi aleb luk megegker ku laya'.

⁴ Mada' lemulun luk merapang, kebalamu, “Do' muyuh metueh idi aleg matot! Allah miak muit nemuyuh, idi teh Ieh ngua' bunu' muyuh.”

⁵ Lun mebuser miak nier, idi lun mebengel miak ninger.

⁶ Lun luk meliai miak sikau' idi ngalai, idi lun mebegkeh ngitang ku awang niatdeh. Abpa' arur miak manud déi' su lu luk ali-ali;

⁷ bada luk pelaba lau' mangun ku takung, idi tana' luk tekering mepanu' ku bued abpa'. Su luk inan bungalé tudo atun, mapet ku uduh idi bulu'.

⁸ Idi inan aceh dalan su ineh, luk titen, “Dalan Macing Inan Luk Meligan.” Lun mesala' na tu-tu miak maya' dalan ini; idi lun luk mebacé na nalan su ineh.

⁹ Na balang su ineh idi pung luk mesangit pana'. Lemulun luk pinuit Tuhan, muli' maya' dalan ini.

¹⁰ Ideh macing Yerusalim dengan mawang niat; ideh menani idi ngitang ku awang niatdeh. Ideh mawang niat macing ruked-ruked, idi ideh na kali' susa' idi dat niat.