YESAYA 33 - BALA LUK DO'

Sembayang Mutuh Pedengan

¹ Bunu' tau miak kumin! Ideh pangeh mano idi naluk, sagan pana' lun baken na nemano rat nedeh, idi na nenaluk nedeh. Iamo' muci ideh na miak mano idi naluk teh. Idi ideh pana' saluken idi nan lun mano.

² O Tuhan méi' nekai. Kai merapet Namu matar nekai anid-anid aco, idi ngulun nekai kareb inan susa'.

³ Kareb Iko pebunu' kuan kai, pupu baken buro ku uni bunu'Mu ineh.

⁴ Binawehdeh uen ngaro idi tebanen.

⁵ Tuhan ineh pelaba rayeh! Ieh ngimet luk amung-amung. Ieh miak manu' Yerusalim ku siri idi piteb,

⁶ Ieh ngeletep bawang pupuNeh. Ieh megéi' matar pupuNeh idi maré ileh idi do' kali' nedeh. Luk meluun raga kuandeh, ieh ineh totdeh nan Tuhan.

⁷ Lemulun luk mekuu' pana' nawar mutuh pedengan. Lun luk duken amé' nguit pedo' pelaba tangi'.

⁸ Dalan rayeh pelaba dat pad na lun maya' ineh. Lemulun na maya' jani'. Seburur pana' nateh luk buren teh.

⁹ Tana' dat ali idi na lemulun amé' lati'. Pulung Lebanon pangeh nelayuh, idi Raked Saron luk mebaleng mepad kudeng su luk ali-ali, idi déi' Basan idi luun Pegkung Karmel don-don merurug.

Tuhan Periteteng Nan Bunu'Neh

¹⁰ Kebala Tuhan kuan amung pupu, “Nekini Ui tumui idi ngegala' laludKu.

¹¹ Amung luk teruayen muyuh na mayu, idi amung luk ruen muyuh pana' na ulek. Muyuh ngaté burur muyuh sebuleng!

¹² Muyuh mekareg mepad kudeng batu luk sabpen mangun ku kapur, idi mepad kudeng tabpa' luk sabpen mangun ku abuh.

¹³ Do' amung lemulun luk muneng idi luk mado ninger ratnan luk inau'Ku, pelé ideh ngamo Negku melalud.”

¹⁴ Lun Sion luk mesala' megegker ku totdeh. Kebaladeh, “Ukum Allah mepad kudeng apui luk ngeseb ruked-ruked. Miakké seburur rat arang tau mepuit ratnan apui luk kudeng ineh?”

¹⁵ Muyuh miak mepuit kudeng muyuh nganau' luk matu. Aleg muyuh makai ngadan muyuh pad muyuh naluk nelun masi'. Idi aleg muyuh ngalap suap. Aleg perurum nelun luk sikal ngaté lemulun idi luk nganau' kekamen luk dat.

¹⁶ Kudeng pieh kudeng ineh muyuh miak uen ngeperuan, idi muyuh miak lutep mepad kudeng libung batu luk meraben, pad muyuh inan akan idi abpa' rupen.

Luk Pelaba Do' Muci Aco

¹⁷ Muci aco muyuh miak kali' Seburur Raca' luk ngimet aceh bawang luk pelaba rayeh dengan uburNeh.

¹⁸ Tot muyuh nan pupu baken luk ngamung pupuk idi lun luk amé' nier dengan lulem mangun ku aceh terawé mo'.

¹⁹ Muyuh na nier lun pupu baken luk medita' niat teh, luk makai buri' luk na kali' muyuh!

²⁰ Nier Sion, su luk inan tau nganau' irau idi aco rayeh. Nier déi' Yerusalim! Kareb ineh na susa' anun-anun su ineh! Ieh mepad kudeng lepo kibung luk na mubuh, ngaceku abpenneh luk nan ngabet na tu-tu bebuten, idi abetneh na uen mutut.

²¹ Tuhan miak ngegala rayehNeh kuan tau. Tau miak tudo tangeb abpa' idi arur pana', iamo' na kapal bunu' miak nalan luun ineh.

^22-23 Amung luk ku ngabet luun kapal bunu' ineh na ulek. Kibung luk ku nganau' kapal nalan na miak tebalad! Amung binaweh bunu' miak tebanen. Inan pelaba ula' pad lemulun luk mekio' pana' miak ngalap aceh babpat. Tuhan sebuleng mangun ku raca' tau. Ieh miak ngimet netau idi matar netau.

²⁴ Seburur pana' nateh luk pebala, “Ui mét,” idi tau ngalap do' ratnan amung-amung sala'.