YESAYA 32 - BALA LUK DO'

Raca' Luk Mepiteb

¹ Muci aco seburur raca' luk mepiteb miak ngimet dengan tuda'-tuda' lun rayeh luk mesiri.

² Idi anid bururdeh mangun ku dicing ratnan bui idi barui. Ideh mepad kudeng arur déi' su luk ali-ali, idi aca' batu rayeh nan tana' luk tekering.

³ Matehdeh kulat idi laliddeh ninger pad ideh kali' pian pupu ineh.

⁴ Na ideh mawer niat teh, iamo' ideh mutut luk mesiri. Idi lemulun luk meteh buri' miak pebala dengan megala'.

⁵ Seburur pana' nateh luk ngerawé lun luk mebacé ineh mesiri, idi lun luk dat ineh matu.

⁶ Lun luk mebacé pebala dengan mebacé idi ngerawé ratnan nganau' kekamen luk dat. Luk ruenneh idi luk belénneh ngedat Allah. Ieh na maré akan kuan lemulun luk melau idi abpa' kuan lemulun luk meparing.

⁷ Ieh ineh lemulun luk dat idi teh ieh nganau' luk dat. Ieh ngerawé ratnan ngesusa' nelun masi' ku balih, pelé ideh na ngalap luk petulu.

⁸ Iamo' lemulun luk matu nganau' luk mesiri idi lutep nganau' luk matu.

Tuhan Ngukum Idi Nuneb Baruh

⁹ O muyuh decur luk tudo idi na ngakem, idi luk na kali' susa', do' muyuh ninger balaku.

¹⁰ Muyuh mawang niat nekini, iamo' lak baruh kareb luk kudeng ini teh, kali' rungen muyuh pelaba susa', ngaceku na bua' anggur lapen muyuh.

¹¹ Macing nekini muyuh tudo idi na kali' susa'. Iamo' nekini, do' muyuh megegker ku tot! Ngelengu ayung muyuh idi ngabet kibung luk nedarak i awa' muyuh.

¹² Mepag ruuk muyuh ku susa' niat muyuh, ngaceku lati' luk mebaleng idi kabun anggur pangeh inusag.

¹³ Tabpa' idi bitarung mulun luun tana' pupuku. Nangi' ku amung ruma' luk inan lemulun do' udeng idi ku bawang luk do' ria'.

¹⁴ Ruma' raca' idi bawang rayeh pana' miak tacin. Ruma' idi libung luk meraben luk matar nedeh uen ngusag macing ruked-ruked. Keladai luk meliput miak nalan-nalan, idi dumba pana' nakap uduh su ineh.

¹⁵ Iamo' Allah ngutang RohNeh kuan tau sekua' teh. Su luk ali-ali mangun mebaleng, idi lati' ngeruat uli' luk do'.

¹⁶ Aput tana' ideh nganau' luk matu idi luk mesiri.

¹⁷ Inan awang idi do' udeng ruked-ruked, ngaceku amung lemulun nganau' luk matu.

¹⁸ Pupu Allah do' udeng bang ruma'deh, idi na luk idi susa' anun-anun. (

¹⁹ Udan batu miak mebpeh luun pulung, idi bawang rayeh miak uen ngusag.)

²⁰ Amung lemulun pelaba awang niat ngaceku petap abpa' kuan lati'deh, idi aput tana' inan laman su luk inan keladai idi sapi' do' udeng.