YESAYA 31 - BALA LUK DO'

Allah Miak Matar Yerusalim

¹ Lemulun luk amé' Masir mutuh pedengan miak kumin! Ideh merapet ku tueh baweh Masir luk pelaba rayeh — kuda, keréta, idi lun pebunu' pana'. Iamo na ideh merapet inan Tuhan Allah Israil luk Meligan, idi na ideh mutuh pedengan rat Neneh.

² Tuhan kali' luk miak ruenNeh! Ieh ngacing susa'. Ieh ngacing jani'Neh ratnan ngukum lemulun luk dat idi lemulun luk ngedengan nedeh pana'.

³ Lun Masir ineh lemulun mo', baken ideh allah! Kudadeh pana', baken ratnan roh iamo' ratnan uang pung! Kareb Tuhan natang ticu'Neh, pupu luk ngedengan metebaceng, idi pupu luk dinengan miak mebpeh, pad amungdeh pad-pad maté.

⁴ Kebala Tuhan negku, “Mepad kudeng lun matar dumba na miak ngusu balang luk pangeh nengaté pung, sagan tu pana' ideh ngarod idi ngitang, kudeng ineh teh Ui ini Tuhan luk Melalud na miak uen mebpeng na matar Pegkung Sion.

⁵ Mepad kudeng suit temulud ngelibung ararneh, kudeng ineh teh Ui ini Tuhan luk Melalud miak matar idi ngedengan Yerusalim.”

⁶ Kebala Allah, “O lun Israil, muyuh nenganau' sala' pa kiungKu idi sikal metueh rat Negku.

⁷ Iamo' nekini, do' lumi amé' Negku! Muci aco amung muyuh miak nala' akang luk ngacing sala', luk inau' muyuh ratnan pirak idi amas.

⁸ Asur miak uen ngusag bang bunu', iamo' baken ngaceku tueh lemulun. Lun Asur miak buro rat bang bunu', idi anak adi'deh miak tebanen.

⁹ Raca'deh miak buro ku totneh, idi lun rayeh pebunu' pelaba tot, pad ideh necan bedéra pebunu'deh.” Tuhan pangeh nepebala –– ieh ineh Tuhan luk inan lun sembayang déi' Sion, idi luk kuan apui mulun déi' Yerusalim luk ku ngeseb baré.