YESAYA 30 - BALA LUK DO'

Na Rurum Nan Masir

¹ Kebala Tuhan, “Lemulun luk ngimet Yahuda miak kumin, ngaceku ideh sikal metueh rat Negku. Ideh maya' dalan luk na icukKu, idi nganau' rurum luk na pianKu, idi ideh iuk-iuk mula' sala'.

² Ideh mutuh pedengan ratnan Masir, dengan na ngitun Negku. Ideh pian pitarin Masir, pad ideh merapet inan raca' Masir.

³ Iamo' raca' ineh na miak ngedengan nedeh, idi kekiped patar Masir, ieh ineh susa'.

⁴ Sagan pana' lun dukendeh pangeh nacing bawang Soan idi Hanis déi' Masir,

⁵ lun Yahuda miak nginuud ratnan ideh merapet inan pupu ineh luk na inan merapet, ieh ineh aceh pupu luk na ngedengan nedeh, kareb ideh nganét pedengan.”

⁶ Ini bala Allah ratnan pung luk déi' su luk ali-ali pa kabing busat aco: “Lun duken ineh lemaba tana' luk inan luk katot, ieh ineh balang, seruang, idi galau luk temulud. Keladai idi untadeh mabeh tuda'-tuda' baré luk meraga kuan aceh pupu luk na miak ngedengan nedeh.

⁷ Pedengan rat Masir na ulekneh. Ngaceku ineh Ui neten neneh, ‘Galau luk ungeng.’ ”

Pupu Luk Ngelaba Ukum

⁸ Allah nengecuk negku ngayud kekamen pupu ineh bang aceh surat, luk mangun ku tanu' ratnan lawédeh macing ruked-ruked.

⁹ Ideh megéi' sikal metueh ratnan Allah, megéi' mebalih, idi megéi ara ninger bada' Allah.

¹⁰ Ideh ngecuk amung nabi pirud. Kebaladeh, “Aleg mada' nekai ratnan luk matu. Mada' ratnan luk pian pedingeren kai. Nima' nekai saluken.

¹¹ Buro rat nekai, idi aleg ngesabeng lawé kai. Na kai pian ninger Allah Israil muyuh luk meligan.”

¹² Iamo' kudeng ini bala Allah Israil luk meligan: “Muyuh na ninger balaKu, idi muyuh merapet ratnan ngaté lemulun idi naluk.

¹³ Muyuh mabeh sala' muyuh. Muyuh mepad kudeng alad batu luk medita' luk mesong. Denak-denak muyuh miak metabpa.

¹⁴ Muyuh mekareg mepad kudeng kuden, pad bila'neh na petap rayeh ku ngalap bareh apui, idi ku ngook abpa' rat bang subuk.”

¹⁵ Kebala Tuhan Allah Israil luk Meligan inan pupuNeh, “Amé' Negku, idi teh merapet Negku, pelé muyuh metueh idi do' udeng.” Iamo' na muyuh pian!

¹⁶ Kebala muyuh, “Kai sikal buro maya' kuda.” Aganeh, buro muyuh! Idi teh kebala muyuh, “Kuda kai mawer.” Setuneh kuda lun luk ngerada' nemuyuh meluun awer!

¹⁷ Meribu muyuh miak buro kareb muyuh nier sebuleng lun luk munu', idi kudeng limeh burur lun luk munu' macing, amung muyuh miak buro. Sebuleng pana' nateh muyuh ketecan ratnan baweh muyuh, iamo' sebuleng diri bedéra mo' luk ketecan luun surud!

¹⁸ Iamo' Tuhan temina' méi' nemuyuh. Idi Ieh pian ngegala' katuNeh nemuyuh, ngaceku Ieh megéi' nganau' luk matu. Awang macing kuan lemulun luk merapet inan Tuhan.

Allah Ngeperuan PupuNeh

¹⁹ O pupu Sion luk tudo déi' Yerusalim, na muyuh miak nangi' peh. Tuhan méi' nemuyuh, idi kareb muyuh ngitang mutuh pedengan, Ieh miak ngor bala muyuh.

²⁰ Tuhan miak maré dereh nemuyuh, iamo' Ieh sebuleng ngedengan nemuyuh idi mada' nemuyuh, pelé muyuh na susa' nakap Neneh baruh teh.

²¹ Kudeng muyuh umai ratnan dalan amé selipa idi selipa, muyuh miak ninger arodNeh pa puet muyuh kebalaNeh, “Ini dalan, do' maya' ineh.”

²² Muyuh nala' akang muyuh luk kikep ku pirak idi amas, mepad kudeng nala' arap, kebala muyuh, “Buro muyuh!”

²³ Kareb muyuh nibu padé, Tuhan miak maré udan pad padé ineh mulun, pelé muyuh miak ngalap uli' luk mula', idi sapi' muyuh pana' inan petap uduh.

²⁴ Sapi' idi keladai luk ngeradu lati' muyuh miak kuman uduh luk meluun do'.

²⁵ Bang aco sineh libung bunu' muyuh luk meraben uen ngusag idi pupu ineh pitayen. Idi abpa' miak manud ratnan anid-anid pegkung idi surud pana'.

²⁶ Bulan merasat mepad kudeng aco. Idi rasat aco tudu' kua' rasat ratnan luk pekalai, mepad kudeng acang tudu' aco bang sebuleng aco! Amung ini miak mangun kareb Tuhan ngabet idi ngedo' urat luk biréNeh inan pupuNeh.

Allah Miak Ngukum Asur

²⁷ Lalud idi rayeh Allah miak siren rat mado! Apui idi rabpun ngegala' usehNeh. Ieh pebala, idi balaNeh ngeseb mepad kudeng apui.

²⁸ Ieh nemaré bui pa atunNeh, mepad kudeng ereb luk nganud anun-anun pana'. Ieh malid pupu-pupu, pad ideh mekusag, pelé ngagka' amung terawédeh luk dat.

²⁹ Iamo' muyuh, O pupu Allah, mawang niat idi menani mepad kudeng luk ruen muyuh kareb medacem, kareb irau. Muyuh do' ria' luk pekarur maya' uni gita, kareb ideh amé Ruma Tuhan luk Matar Israil.

³⁰ Tuhan miak nima' amung lemulun ninger arodNeh luk buren, idi kali' tueh usehNeh. Inan budung apui, libuleh, udan batu, idi udan luk mula'.

³¹ Lun Asur matot kareb ideh ninger arod Allah idi kali' tueh ukumNeh.

³² Kareb Allah necat nedeh kidi-kidi, pupuNeh peranga' akang pekarur maya' uni bas idi gita! Allah sebuleng miak munu' nelun Asur.

³³ Mon, aceh apui su luk inan ngeseb raca' Asur pangeh tinina'. Ieh medalem idi rayeh pipang, idi pelaba ula' kayuh apui binuun su ineh. Tuhan miak nginiat luun bubpun ineh, idi niatNeh mepad kudeng aceh arur apui pelé ngeseb amung ineh.