YESAYA 3 - BALA LUK DO'

Gagau Déi' Yerusalim

¹ Nekini Tuhan, ieh ineh Tuhan luk Melalud, temina' nala' rat Yerusalim idi Yahuda amung-amung luk inan lemulun merapet. Ieh miak nala' amung akandeh idi abpa'deh,

² lundeh luk mesangit, lun pebunu'deh, lundeh luk mutut ukum, nabideh, lundeh luk mangun, lun luk ngimet nedeh,

³ lun rayeh bawehdeh, lun rayeh bawangdeh, lun rayeh luk ngimet nedeh, idi idé-idé luk makai ileh Sétan pad ngacing luk piandeh.

⁴ Tuhan miak nima' anak adi' luk na petap ileh ngimet nedeh.

⁵ Amung lemulun miak ngedereh nelun baken. Anak-anak na ngedita' nelun merar, idi lemulun luk mebacé na ngedita' lemulun luk miak buren.

⁶ Kareb ineh, tuda'-tuda' burur lemulun miak mili' seburur rat arang inuldeh, kebaladeh, “Iko inan ayung, do' iko mangun ku lun rayeh kai bang susa' ini.”

⁷ Iamo' kebalaneh, “Ara' ui! Ui na miak ngedengan nemuyuh. Ui pana' na petap akan idi ayung. Aleg nganau' negku ku lun rayeh muyuh!”

⁸ Matu, Yerusalim miak kumin! Yahuda malé metabpa. Amung luk beléndeh idi luk ruendeh sikal metueh ratnan Tuhan. Ideh ngedat Allah dengan rungen.

⁹ Tueh niatdeh mangun ku lun nekali' bang besara'deh. Ideh nganau' sala' dengan megala' mepad kudeng lun Sodom. Ideh ngacing ukum kuan bururdeh sebuleng.

¹⁰ Lemulun luk matu mawang niat idi ideh miak ngalap peruan ratnan uli' kekamendeh.

¹¹ Iamo' lemulun luk dat miak kumin idi ngalap ua' kekamendeh.

¹² Lun luk maré usin kebiten ngedereh pupuKu, idi lun luk inandeh pebaleh naluk nedeh. O pupuKu, lun rayeh muyuh ngeraruh nemuyuh, pad muyuh na kali' dalan luk matu.

Tuhan Mutut Besara' PupuNeh

¹³ Tuhan temina' mutut besara'. Ieh temina' ngukum amung pupu.

¹⁴ Tuhan pian ngukum lun rayeh idi lun luk ngimet pupuNeh. Ieh ngadu' nedeh, kebalaNeh: “Muyuh pangeh nengaro kabun anggur, idi ruma' muyuh panu' ku luk ilap muyuh rat nelun masi'.

¹⁵ Muyuh mesala' ngaceku muyuh ngedereh pupuKu, idi muyok nelun masi'. Ui ini Tuhan luk Melalud pangeh nepebala.”

Bada' Kuan Decur Yerusalim

¹⁶ Kebala Tuhan, “Decur Yerusalim pelaba dita' niat! Ideh tungog idi ngimateh. Ideh nalan-nalan pian siren, idi karing luk luun kukuddeh ngekéng.

¹⁷ Iamo' Ui sikal ngukum nedeh — Ui ngiki uluhdeh pad ideh mebutal.”

¹⁸ Kareb ineh Tuhan miak ngalap ratnan decur Yerusalim amung-amung luk inandeh medita' niat — pakeldeh, patadeh, banédeh,

¹⁹ idi leku'deh. Ieh miak ngalap ebpu kiungdeh,

²⁰ idi rongdeh; gimet luk luun langendeh idi luk i awa'deh;

²¹ susing luk luun bua' ticu'deh, idi susing icungdeh;

²² amung kuyu' buyordeh, takipdeh, gondeh, kapildeh;

²³ kuyuh' luk pelaba lipi, belacadeh luk pelaba do', abet dierdeh idi ebpu uluh teh.

²⁴ Inan dat buen ku libal do' buen. Inan nuper ku libal baret. Idi abpukdeh luk pelaba do' misu' ku butal; inan takip dat ku libal takip luk do'; do' tagadeh misu' ku igu'.

²⁵ Amung deléi bang bawang Yerusalim idi lun luk mesangit pana' miak pitayen bang bunu'.

²⁶ Amung tanga' bawang miak temido idi nangi'. Yerusalim ineh mepad kudeng decur luk tudo lubpa luun tana'.