YESAYA 29 - BALA LUK DO'

Ukum Kuan Yerusalim

¹ Bubpun Allah, ieh ineh Yerusalim miak kumin! Nima' nedeh nganau' iraudeh idi aco rayehdeh selak, dueh lak teh.

² Pangeh ineh Allah miak ngacing susa' kuan bawang luk titen, “Bubpun Allah.” Inan tangi' idi tido, idi bawang Yerusalim miak mangun ku aceh bubpun su luk inan ngeseb baré luk sabpen.

³ Allah miak munu' bawang ineh, idi ngelibut neneh, pad Ieh ngerieng neneh.

⁴ Kareb ineh arod Yerusalim mepad kudeng arod ada' luk nutun pebala rat liang tana'.

⁵ O Yerusalim, amung pupu baken luk ngerieng namu miak mepalid ku bui mepad kudeng abuh, idi bawehdeh luk ngatot miak mepalid ku bui mepad kudeng lipang padé. Idi denak-denak

⁶ Tuhan luk Melalud miak muit namu dengan lalam idi ruyuh tana'. Ieh miak ngacing barui, libuleh, idi budung apui;

⁷ idi amung baweh pupu baken luk ngerieng bawang su luk inan bubpun Allah dengan amung repapehdeh miak buro mepad kudeng nupi, idi mepad kudeng luk pangeh tirawé kareb medacem.

⁸ Amung pupu luk mepamung sikal ngerieng Yerusalim ineh mepad kudeng seburur lemulun luk pelaba lau luk nginupi kuman, iamo' kareb ieh kulat ieh melau, idi mepad kudeng lemulun luk pelaba paring luk nginupi ngirup, iamo' kareb ieh kulat telananneh tekering.

Seburur Lemulun Pana' Nateh Luk Ninger Bada'

⁹ Do' muyuh nacu bacé muyuh idi mawa dengan mebuser! Idi muyuh mabuk, iamo' baken ku abpa' anggur. Muyuh midar, iamo' baken ngaceku arak.

¹⁰ Tuhan nenganau' nemuyuh medacep mateh; pad muyuh pian rudap.

¹¹ Setuneh nabi mangun ku mateh lun mula', iamo' Allah pangeh nengebuser nedeh. Ilung amung luk sinier nabi miak uen ngalum nemuyuh. Ieh ineh mepad kudeng aceh surat luk pangeh itu.

¹² Kudeng iko maré ineh ruen lun luk na mileh maca', ieh miak pebala, “Ui na mileh.”

¹³ Kebala Tuhan, “Lemulun ini siayu sembayang Negku, iamo' na ilung baladeh, idi niatdeh mado rat Negku. Sembayangdeh ineh mangun ku ukum idi adat lemulun mo', luk pangeh ipaldeh.

¹⁴ Ngaceku ineh Ui miak ngagap nedeh ku tuda'-tuda' susa' luk macing denak-denak nedeh. Lemulun luk mileh misu' ku lun luk mebacé, pad ilehdeh na ulek.”

Lun Luk Mada' Luk Mebalih

¹⁵ Lemulun luk pian ngapung terawé deh ratnan Tuhan miak kumin! Ideh nganau' luk pangeh tirawédeh dengan lulem. Ideh ngerawé lemulun na miak nier nedeh idi kali' luk ruendeh.

¹⁶ Kekamendeh tekilu'. Sapehké luk meluun rayeh, lun luk mileh nganau' kuden, kian tana' kuden lek? Miakké anun-anun luk inau' lemulun pebala, “Iko na nenganau' negku”? Miakké ieh pebala, “Iko na mileh”?

¹⁷ Mepad kudeng balé, na mio teh pulung kara misu' ku lati, idi lati' misu' ku pulung kara.

¹⁸ Kareb ineh lun mebengel miak ninger lemulun maca' surat, idi lun nebuser, luk pangeh netudo bang dacem, miak kulat mateh idi nier.

¹⁹ Lemulun luk na ngadan, idi lemulun luk masi' miak ngalap awang luk barén Allah lun Israil luk Meligan.

²⁰ Ieh ineh kekiped lemulun luk ngedereh nelun baken, idi luk situnga nan Allah. Amung lun mesala' miak pitayen.

²¹ Allah miak ngaté lemulun luk ngedat nelun baken, idi lemulun luk mebpeng nelun luk mesala' na ngalap ukum, idi lemulun luk mebalih, pad na mutut ukum luk mesiri kuan lemulun luk matu.

²² Idi nekini bala Tuhan, Allah lun Israil, luk nemuit Ibrahim ratnan susa', “O pupuKu, muyuh na miak uen ngigu' teh idi muyuh na mesia' kiung ku igu' teh.

²³ Muyuh miak kali' anak-anak luk barénKu nemuyuh, pad muyuh ngamo Ui ini Allah Israil luk Meligan. Muyuh miak ngerayeh Negku idi matot Negku.

²⁴ Lun luk mebacé miak sibada' idi lemulun luk megéi' ngedureng mawang niat badén.”