YESAYA 28 - BALA LUK DO'

Bada' Kuan Imet Luk Pa Tinueh Busat Aco

¹ Imet Israil miak kumin! Uburneh buro mepad kudeng pata busak luun uluh lun rayeh-rayehneh luk megéi' mabuk. Uluhdeh do' buen ku umaudeh, iamo' ideh telubid ngaceku mabuk.

² Tuhan temina' ku lemulun luk metueh idi melalud luk miak ngerieng nedeh. Ieh macing mepad kudeng udan batu, idi teh mepad kudeng udan luk mula' idi tubu' belen pana' pad maput tana'.

³ Dita' niat lun rayeh luk mabuk ineh miak uen ngeradu'.

⁴ Ubur lun rayeh ineh luk medita' niat miak buro mepad kudeng bua' gita' luk atun luk lapen kenen kareb ideh melak.

⁵ Kareb ineh Tuhan luk melalud mepad kudeng aceh pata busak luk pelaba do' kuan pupuNeh luk ketecan.

⁶ Ieh miak maré ileh luk mesiri kuan lemulun luk mutut besara', idi kuu' kuan lemulun luk ngusu bunu' luk ngerieng amung tanga' bawang.

Yesaya Idi Nabi-Nabi Yahuda Luk Megéi' Mabuk

⁷ Nabi idi imam pana' mabuk idi midar. Ideh pangeh nengirup pelaba ula' abpa' anggur idi arak, pad ideh metebaceng ku raruh niatdeh. Nabi-nabi ineh pelaba abuk, pad ideh na kali' ilung luk sirendeh ratnan Allah, idi imam-imam pana' pelaba abuk, pad ideh na miak mutut besara luk barén kuandeh.

⁸ Méja su luk inandeh tudo maput ku uta', pad na luk meligan.

⁹ Kebaladeh ratnan ui, “Idéké luk badén lemulun ineh? Idéké pian badénneh? Bada'neh petulu ku anak isuut luk baruh-baruh nugka' niti' mo'.

¹⁰ Ieh mada' netau ngadan urup, ayat-ayat, idi bada'.”

¹¹ Kudeng muyuh na ninger balaku, Tuhan miak nima' pupu baken mada' nemuyuh dengan buri' luk baken.

¹² Ieh pian ngato erur idi ngubuk nemuyuh, iamo' muyuh ara' ninger balaNeh.

¹³ Ineh punneh Tuhan pian mada' nemuyuh ratnan ngadan urup, ayat-ayat, idi bada. Idi muyuh metebaceng ku anid akang muyuh. Muyuh miak uen ngurat idi mekaneh abpung pad muyuh tebanen.

Batu Lidung Kuan Sion

¹⁴ O lemulun luk medita' niat, luk ngimet bawang Yerusalim idi pupuneh; do' ninger bala Tuhan.

¹⁵ Muyuh nengadan, kebala muyuh, “Kai pangeh nenganau' jani' dengan até, idi su luk inan até pana'. Na kai miak manud ku tubu' belen, ngaceku amung-amung balih idi saluk kai ngelibung nekai.”

¹⁶ Kudeng ini bala Tuhan: “Ui nganau' déi' Sion aceh tapin luk meraben. Luun ineh Ui nganau' aceh batu lidung luk metueh. Idi bala ini inayud luunneh, ‘Lemulun luk manu mulai niat.’

¹⁷ Luk mesiri mangun ku tari tapin ineh, idi luk matu mangun ku batu luk pinier siri.” Iamo' udan batu miak nala' amung balih muyuh, idi ereb miak ngusag su luk inan muyuh do' udeng.

¹⁸ Jani' luk inau' muyuh dengan até idi su luk inan até miak talan. Kareb susa' macing, muyuh uen ngelaya' ku ineh.

¹⁹ Susa' ineh macing kidi-kidi, idi anid-anid pekak. Muyuh miak mabeh susa' ineh tebaco kedangan. Anid bada' luk mebaruh ratnan Allah ngacing tot luk mebaruh.

²⁰ Muyuh mepad kudeng lemulun luk bang balé' luk rudap luun bitaran luk pelaba kamu', idi tarubneh pelaba isuut.

²¹ Tuhan miak munu' mepad kudeng luk inau'Neh déi' Pegkung Perasim idi déi' luun Raked Gibion; pad ngacing luk pianNeh, pelé lemulun miak mawa nier kekamenNeh. Ieh miak ngeriput kekamenNeh. Idi kekamenNeh ineh baken ratnan luk pekalai.

²² Aleg meriruh ku bada' luk barénku nemuyuh! Kudeng muyuh meriruh meluun susa' kuan muyuh mepuit ratnan susa' ineh. Ui pangeh neninger luk pinutut Tuhan luk Melalud. Ieh pian ngusag aput bawang muyuh.

Ileh Allah

²³ Do' muyuh ninger balaku.

²⁴ Seburur lemulun na ngeradu lati'neh kidi-kidi pad ieh miak uen nibu.

²⁵ Kareb tana'neh pangeh rinadu, ieh nibu ilung adas luk mepaci' idi ladeh teh. Ieh nibu padé idi ikun. Iring lati'neh ieh nibu tibu luk baken.

²⁶ Ieh kali' dalan nganau' anun-anun ngaceku ieh bida' Allah.

²⁷ Na ieh rumik adas luk mepaci' idi ladeh teh, iamo' ieh ngagka ilungneh.

²⁸ Na ieh ngusag ilung padé kareb ieh rumik. Kali' rungen ieh rumik makai kukud, pad ilungneh na mekareg.

²⁹ Ileh ineh macing ratnan Tuhan luk Melalud. Ieh pelaba ileh mada'. Idi amung luk teruayenNeh pana' meriput teh.