YESAYA 27 - BALA LUK DO'

¹ Kareb ineh Tuhan miak ngukum Galau, ieh ineh galau luk suloi ineh, idi teh pung luk dat luk tudo bang abpa' rayeh, ku pelapetNeh luk melalud idi metueh.

² Kareb ineh Tuhan miak pebala,

³ “Ui ngasa' kabun anggurKu, idi megéi' mubpur neneh. Ui matar kabun ineh tebaco kedangan, pad seburur pana' nateh luk ngusag ineh.

⁴ Na Ui museh nan anggur ineh. Meluun do' Ui pebunu' nan tabpa' idi bitarung, pad Ui ngeseb nedeh macing mabud.

⁵ Iamo' kudeng bunu' pupuKu pian pitarinKu, do' ideh pedo' Negku. Matu, do' ideh pedo' Negku.”

⁶ Kareb ineh pupu Israil, ieh ineh inul Yakub, miak inan uat pad ideh mulun idi ideh nginulih idi kebusak. Tana' maput ku bua'deh.

⁷ Ukum Tuhan kuan bunu' Israil meluun berat ratnan ukumNeh kuan Israil. Ngaceku na mula' lemulun pinatéNeh.

⁸ Ukum Tuhan kuan Israil, ieh ineh Ieh nemaré nedeh tebanen. Ieh nemalid nedeh ku bui luk dat rat pa busat aco.

⁹ Israil na miak ngalap do' ratnan sala'neh, pad macing amung bubpun batu lun na manu pangeh nusag, idi pad macing amung ulung idi bubpun su luk inan ngeseb umau luk do' buen pangeh tila'.

¹⁰ Bawang luk inan libung luk meraben pangeh nusag. Ieh mangun ku su luk ali-ali, idi teh ku laman sapi' su luk inandeh ngato erurdeh idi su luk inandeh nakap uduh.

¹¹ Angat-angat kayuh metekering idi neputul. Idi decur nengalap ineh ku kayuh apui. Ngaceku pupu ineh na kali' anun-anun, idi Allah luk nemudut nedeh na méi' nedeh.

¹² Kareb ineh Tuhan miak ngukum pupuNeh Israil, rat selipa bawang macing selipa, ieh ineh rat Abpa' Pirat macing lakan tana' bawang Masir. Ieh miak ngatad luk do' ratnan luk dat.

¹³ Kareb ineh, aceh serupit miak muni pad nawar nelun Israil muli' rat Asur idi Masir, bawang su luk inandeh tiban. Ideh miak macing idi sembayang inan Tuhan déi' Yerusalim, ieh ineh luun pegkungNeh luk meligan.