YESAYA 26 - BALA LUK DO'

Allah Maré Tueh Kuan PupuNeh

¹ Kareb ineh, lemulun menani déi' bawang Yahuda, kenanideh: Bawang tau meraben! Allah sebuleng matar libungneh!

² Ngukab amung tanga' bawang, idi nima' pupu luk mesiri semuet, ieh ineh pupu luk lutep maya' Tuhan.

³ Iko, O Tuhan, ngeriput awang lemulun luk lutep manu Namu idi luk merapet Namu.

⁴ Do' merapet inan Tuhan macing ruked-ruked, ngaceku Tuhan ineh Libung Batu luk Meruked.

⁵ Ieh nengigu' lemulun luk medita' niat, idi nengusag bawangdeh luk meraben, pad libungneh netabpa.

⁶ Lemulun luk pidereh atun idi lun masi' pana' ngeradu' neneh nekini.

⁷ O Tuhan, Iko ngeraked dalan kuan lemulun luk matu, pelé ideh maya' dalan luk mebalad.

⁸ Kai maya' pianMu idi merapet Namu, Iko mo' luk inan kai mawang niat.

⁹ Kareb medacem pana' ui geregan perurum Namu, pad ui nakap Namu dengan amung niatku. Kareb Iko ngukum tana' ini idi uang tana' ini, ideh miak kali' ratnan luk matu.

¹⁰ Sagan pana' Iko méi' nelun luk dat, ideh na sibada' nganau' luk matu. Bang bawang lemulun luk matu pana', ideh megei' nganau' sala'. Ideh na pian nier rayehMu.

¹¹ Bunu'Mu na kali' Namu sikal ngukum nedeh. O Tuhan, do' ngigu' nedeh idi nima' nedeh medereh. Ngegala' awaMu kuan pupuMu siren bunu' ineh.

¹² O Tuhan, Iko sikal ngeperuan nekai. Amung-amung luk ruen kai mangun ngaceku pedenganMu.

¹³ O Tuhan Allah kai, kai pangeh inimet pupu baken, iamo' Iko mo' sebuleng Tuhan kai.

¹⁴ Ideh pangeh naté idi ideh na mulun peh; rohdeh pana' na miak tumui, ngaceku Iko pangeh nengukum idi nengaté nedeh. Na lemulun ngerawé nedeh peh.

¹⁵ O Tuhan, Iko nenganau' pupu kai rayeh, idi nengiuk lakan tana' kai libut-libut bawang, pelé ngadanMu uen ngerayeh.

¹⁶ O Tuhan, Iko nengukum pupuMu pad ideh sembayang nakap Namu bang derehdeh.

¹⁷ O Tuhan, Iko nenganau' nekai ngitang, mepad kudeng decur luk mét nenganak.

¹⁸ Kai mét idi medereh, iamo' na kai nengeruat luk anun-anun. Kai na nengacing ulun kuan tana' kai, idi na kai nengula' uang tana' ini pana'.

¹⁹ Pupu kai luk pangeh naté miak mulun baruh! Butungdeh miak muli' mulun! Amung lemulun luk rudap bang tanemdeh, miak tumui idi menani ku awang niatdeh! Mepad kudeng ipup ngeba' tana', kudeng ineh teh Tuhan miak nui lemulun luk naté mon.

Tuhan Ngukum Idi Nuneb Baruh

²⁰ O pupuku, semuet bang ruma' muyuh idi ngitek tanga'. Sigapung segageh, pad macing useh Allah ugka'.

²¹ Tuhan macing sikal ngukum lemulun bang tana' ini ngaceku sala'deh. Até lemulun luk inau' dengan lulem bang tana' ini miak uen ngegala', pad tana' na miak ngapung butung lemulun luk pinaté ineh teh.