YESAYA 25 - BALA LUK DO'

Aceh Nani Ubur

¹ O Tuhan, Iko ineh Allahku, Ui ngerayeh Namu, idi ngubur ngadanMu; Iko nenganau' kekamen luk inan mawa; Iko lutep ngacing luk tirawéMu mon.

² Iko nengisu' bawang-bawang mangun ku usag, idi nengusag libungdeh luk meraben. Ruma'-ruma' raca' luk pinudut bunu' kai pangeh netabpa.

³ Pupu baken luk melalud ngubur Namu, idi Iko luk inan matot bang bawang pupu luk mekuel.

⁴ Iko mangun ku libung kuan lun masi' bang susa'deh. Iko luk nucung nedeh kareb mebarui, idi ngelungung nedeh kareb mét idang. Niat lemulun luk na méi' mepad kudeng barui kareb meteneb,

⁵ idi rikan luun tana' luk tekering. Iamo' Iko O Tuhan nengagka' bunu' kai; Iko nengagka' arod lemulun luk mekuel, mepad kudeng laput ngelungung kareb mét idang.

Allah Temina' Nganau' Irau

⁶ Luun Pegkung Sion ini Tuhan luk Melalud miak nganau' aceh irau kuan amung pupu bang tana' ini — dengan akan idi abpa' anggur luk meluun do'.

⁷ Kareb ineh Ieh miak mubuh laput susa' luk ngelungung amung-amung pupu.

⁸ Tuhan miak ngagka' até macing ruked-ruked! Ieh miak miid abpa' mateh amung-amung lemulun idi nala' igu' amung pupuNeh luk aput-aput tana'. Tuhan pangeh nepebala.

⁹ Kareb ineh, amung lemulun miak pebala, “Ieh ineh Tuhan tau! Tau pangeh merapet Neneh idi Ieh nemuit netau idi nekini tau pelaba awang niat, ngaceku Ieh nengulun netau!”

Tuhan Miak Ngukum Moab

¹⁰ Ticu' Tuhan rirengNeh luun Pegkung Sion, iamo' lun Moab uen ngeradu' mepad kudeng geramih uen ngeradu' luun téi'.

¹¹ Ideh miak natang ticu'deh, mepad kudeng lemulun luk nutun lemangui. Iamo' Tuhan miak narem dita' niatdeh dengan amung kekamen ticu'deh.

¹² Allah miak ngusag amung libung Moab luk meraben perapu dengan ardeh luk medita', pad amung ineh metabpa.