YESAYA 24 - BALA LUK DO'

Tuhan Miak Ngukum Tana' Ini

¹ Tuhan miak ngusag amung-amung luk bang tana' ini, pad ieh mangun ku su luk ali-ali. Ieh miak ngebelikui luun tana' idi ngatad amung lemulun.

² Amung-amungdeh mepad ukum — lun imam idi lun mula', demulun idi lun luk kuan nedeh, lun luk melih idi lun luk masui, lun luk maré luk kebiten idi lun luk ngabit, lun do' idi lun masi'.

³ Tuhan miak ngalét tana' ini idi ngusag luk bang ineh. Tuhan pangeh nepebala.

⁴ Aput tana' metekering idi na abpa', idi na lalud peh. Langit idi tana' pana' pad-pad melaya'.

⁵ Lemulun pangeh nengelutak tana' ini, ngaceku ideh ngelaba ukum Allah idi na ngerawé jani' Allah luk meruked ineh.

⁶ Ngaceku ineh Allah pangeh nengediman tana' ini, pad ieh uen ngusag. Uang tana' ini uen ngua' maya' kudeng luk inau'deh. Kinula' lemulun luk mulun iuk amé' pawa'.

⁷ Anggur melayuh, idi abpa'neh sesuut mo'. Lemulun luk mawang niat atun pangeh mesusa' nekini.

⁸ Idi uni gita idi sulingdeh pangeh nugka'.

⁹ Idi teh na lemulun ngirup abpa' anggur idi menani dengan mawang niat peh. Na ideh pian ku én abpa' anggur teh.

¹⁰ Bawang rayeh na isa'. Anid ruma' initek pad lemulun na miak semuet.

¹¹ Lemulun lingo-lingo luun dalan idi ngitang mutuh abpa' anggur. Awang niat pangeh neburo macing ruked-ruked; ieh pangeh inusu rat luun tana'.

¹² Bawang pangeh inusag idi amung tanga' pana' netabpa.

¹³ Ini luk miak mangun bang anid bawang aput tana'. Mepad kudeng pangeh ranih, idi bua' saitun pangeh bibpet rat udungneh idi bua' anggur luk kekiped pangeh ilap ratnan lawadeh.

¹⁴ Lemulun luk ketecan menani ku awang niatdeh. Lemulun luk pa acep aco miak mada' ratnan rayeh Allah,

¹⁵ idi lemulun luk pa busat aco miak ngubur Neneh. Lemulun luk tudo tangeb abpa' rayeh miak ngubur Tuhan Allah lun Israil.

¹⁶ Rat iring tana' tau ninger nani ubur ratnan Israil, pupu luk matu ineh. Iamo' na luk idi rapet kuanku! Ui iuk-iuk melaya'! Lemulun luk dat lakat nganau' luk dat, idi datdeh iuk-iuk amé' rayeh.

¹⁷ O lemulun luk bang tana' ini! Inan luk katot, lubang, idi abpung nganét nemuyuh.

¹⁸ Lemulun luk nutun mepuit ratnan luk katot miak mebpeh bang lubang, idi lemulun luk mepuit ratnan lubang miak mekaneh abpung. Pelaba ula' udan mebpeh rat déi' langit, idi tapin tana' miak meruyuh.

¹⁹ Tana' miak turak idi mekurar.

²⁰ Tana' meruyuh mepad kudeng lun mabuk idi megué mepad kudeng lepo kareb mebarui. Babeh sala' tana' ini pelaba rayeh. Ieh miak mekurar idi na petuneb baruh teh.

²¹ Kareb ineh Tuhan miak ngukum ada' luk dat déi' arang gawa' idi lun luk ngimet bang tana' ini.

²² Allah miak ngamung raca'-raca' mepad kudeng lun luk tiban luk pimung bang aceh lubang. Ieh nutup nedeh pad macing kareb ideh miak kumin.

²³ Bulan amé' medacem, idi mateh aco na macang peh, ngaceku Tuhan luk Melalud mangun ku raca'. Ieh miak ngimet déi' Yerusalim luun Pegkung Sion idi lun rayeh-rayeh pupuNeh miak kali' uburNeh.