YESAYA 23 - BALA LUK DO'

Bala Ratnan Bawang Sur

¹ Ini bala ratnan bawang Sur. O muyuh lun luk ngakem bang kapal déi'abpa' rayeh, ngarod ku dat niat muyuh! Bawang Sur luk inan kapal muyuh ucu' pangeh inusag. Ruma'neh idi su luk inan kapal mapit inusag teh. Kareb kapal muyuh lemubed rat Siprus, muyuh miak ninger bala ineh.

² O muyuh lun Sidon luk pepua', temido muyuh!

³ Muyuh nengecuk nedeh guta abpa' rayeh, pad ideh melih idi masui padé luk rat déi' Masir, idi teh pad ideh pepua' dengan amung pupu baken.

⁴ O bawang Sidon, iko inigu'! Abpa' rayeh idi ribaruh abpa' rayeh pana' na pian namu, kebaladeh, “Na anakku, anak deléi idi anak decur nateh luk isa'ku.”

⁵ Lun Masir pana' miak megagap idi mawa kareb ideh ninger ratnan usag Sur.

⁶ O muyuh lun Sur, ngarod ku dat niat muyuh! Idi buro amé' Tarsis!

⁷ Matuké ini bawang Sur luk do' ria', luk pinudut mon? Matuké ini bawang luk nengecuk nelun guta abpa' rayeh pad nganau' tuda'-tuda' bawang baruh?

⁸ Idéké luk nengerawé ngacing susa' ini kuan Sur, ieh ineh bawang luk iuk-iuk amé' rayeh, idi su ineh lun rayeh-rayeh luk pepua' meluun buren aput tana'?

⁹ Tuhan luk Melalud luk nengerawé amung ineh, ngaceku Ieh pian ngagka' dita' niatdeh ratnan amung luk inau'deh, pad ngigu' lun rayehdeh luk buren.

¹⁰ O muyuh lun Tarsis, do' nganau' lati', ngaceku Sur na ngedengan namu peh.

¹¹ Tuhan pangeh nenatang ticu'Neh luun abpa' rayeh, pad tuda'-tuda' imet pangeh netabpa. Tuhan pangeh nemutut ukum ratnan amung bawang Kanaan luk meraben uen ngusag.

¹² O bawang Sidon, awang niatmu na idi peh. Pupumu pederen, idi sagan pana' ideh buro amé' Siprus, ideh na miak mepuit.

¹³ (Lun Babil, baken lun Asur, luk nemaré bawang Sur kuan pung luk meliput. Lun Babil ineh luk nemudut pudut luk medita' su luk inandeh nengerieng bawang. Ideh luk nengusag libung Sur luk meraben, idi luk nengusag amung bawang ineh.)

¹⁴ O muyuh lun luk ngakem bang kapal déi' abpa' rayeh, ngarod ku dat niat muyuh. Bawang luk inan muyuh merapet pangeh inusag.

¹⁵ Kareb ineh, na lemulun miak ngerawé Sur tudu' ngepulu' lak kinioneh, mepad kinio ulun seburur raca'. Pangeh ineh Sur mepad kudeng aceh decur luk mesawa' bang nani ini:

¹⁶ Ngalap gitamu, idi nalan-nalan bang bawang, O decur luk mesawa' luk na teruayen! Nateg gitamu idi menani, pad deléi miak ngerawé namu teh.

¹⁷ Pangeh tudu' ngepulu' lak, Tuhan miak nima' Sur lemubed nganau' kekamenneh luk atun. Ieh miak masui bururneh kuan amung pupu aput tana' ini.

¹⁸ Usin luk lapenneh ratnan pepua' miak barén kuan Tuhan. Na ieh nganug ineh, iamo' lemulun luk sembayang inan Tuhan miak makai usinneh ku melih akan idi ayungdeh.