YESAYA 22 - BALA LUK DO'

Bala Ratnan Yerusalim

¹ Ini bala ratnan Raked Su luk inan Luk Sinier. Anunké luk mangun? Ngudehké amung lemulun bang bawang ineh nganau' irau luun apo ruma' luk mebalad?

² Amung bawang ineh do' ria' idi mawang niat. Anak itinmu luk naté bang bunu' ini na naté uned pebunu'.

³ Amung lun rayeh muyuh neburo idi tiban kareb nateh ideh nengelatik sebuleng ileb.

⁴ Nima' negku nangi' buleng-buleng. Aleg ngubuk negku, ngaceku pupuku pelaba ula' naté.

⁵ Ini aceh kareb tot, laya', idi gagau déi' Raked Su luk inan Luk Sinier. Tuhan Allah luk Melalud nengacing amung ineh kuan tau. Libung bawang tau pangeh inusag lun, idi arod lemulun luk mutuh pedengan melinguh arang pegkung.

⁶ Lun pebunu' rat bawang Elam nacing maya' kuda, idi netemina' ku binor idi ileb. Lun pebunu' rat bawang Kir netemina' ku utap.

⁷ Aput raked luk mebaleng déi' Yahuda inan keréta, idi lun pebunu' luk maya' kuda tuped pa atun tanga' Yerusalim.

⁸ Amung-amung luk ku matar Yahuda netabpa. Kareb ineh muyuh nenguit repapeh bunu' rat bang Ruma' luk Bang Pulung.

^9-10 Muyuh nekali' song luun libung Yerusalim. Muyuh nengiap amung ruma' déi' Yerusalim idi nengusag sebuangdeh pad ngalap batu pingedo' libung bawang ineh.

¹¹ Muyuh nemudut aceh luk inan abpa' bang bawang, pad nganug abpa', pelé ngalap abpa' luk manud ratnan takung luk mon. Iamo' muyuh na nengerawé Allah luk nengeletep amung ineh rat mon.

¹² Tuhan luk Melalud nengecuk nemuyuh nangi' idi temido, ngiki uluh muyuh idi nacung.

¹³ Iamo' muyuh neriruh idi nenganau' irau. Muyuh nengeret dumba idi sapi' ku kikid muyuh, idi nengirup abpa' anggur. Kebala muyuh, “Meluun do' tau ngirup idi kuman, ngaceku nebpa tau maté.”

¹⁴ Kebala Tuhan Allah luk Melalud negku, “Ideh na miak ngalap do' ratnan dat ini ruked ulundeh. Ui ini Allah luk Melalud pangeh nepebala.”

Bada' Kuan Sebna

¹⁵ Tuhan luk Melalud nengecuk negku amé' matun ni Sebna, ieh ineh lun rayeh ruma' raca', idi pebala neneh,

¹⁶ “Ngudeh iko kudeng ineh? Ngudehké iko nguer batu ku tanem luk pelaba do' kuan bururmu sebuleng déi' luun pegkung?

¹⁷ Kian, iko lun rayeh lek, iamo' Tuhan miak ngalap namu idi nala' namu

¹⁸ Ieh miak ngelilid namu mepad kudeng bul, idi mepet namu amé' bang bawang luk rayeh. Iko miak maté su ineh iring amung keréta luk inanmu medita' niat. Iko ngigu' ruma' tuanmu!

¹⁹ Tuhan miak nala' namu ratnan kekamenmu idi ngebeneh namu ratnan kekamenmu luk medita'!”

²⁰ Kebala Tuhan ni Sebna, “Kareb ineh Ui miak nawar demulunKu Eliakim Hilkia.

²¹ Ui miak ngayung neneh ku kuyu' idi abet awa' kekamenmu, idi maré amung laludmu neneh. Ieh mangun ku aceh taman kuan lun Yerusalim idi Yahuda.

²² Ui maré taka Ruma' Daud luun tudungneh. Luk kabinneh na miak uen ngitek, idi luk uenneh ngitek na miak kabin.

²³ Ui miak ngeletep neneh mepad kudeng aceh paku', luk pinaku'. Idi ieh miak mangun ku lawa ubur kuan uang tetek ruma'neh.

²⁴ “Iamo' amung pupu luk muneng neneh idi uang tetek ruma'neh mangun ku babeh luk meberat kuanneh. Ideh mepad kudeng lacang idi periuk luk tekito luun paku',

²⁵ pad paku' luk meraben ineh miak mebubput idi mebpeh. Ineh kekiped amung luk tikito luunneh.” Tuhan pangeh nepebala.