YESAYA 21 - BALA LUK DO'

Tabpa Babil

¹ Ini bala ratnan Babil. Mepad kudeng libuleh luk malid déi' su luk ali-ali, susa' miak macing rat aceh bawang luk katot.

² Inan aceh luk sinierku ratnan tuda'-tuda' susa' luk pelaba dat ratnan naluk lemulun idi ngusag bawang. O baweh Elam, amé' pebunu'! O baweh Midi, ngerieng amung bawang! Allah miak ngagka' dereh luk icing bawang Babil kuan lun Israil.

³ Luk sinier idi luk pindengerku bang amung ineh nganau' negku matot, idi ui mét mepad kudeng decur luk mét nenganak.

⁴ Melibung sirenku, idi ui megegker ku totku. Ui nganét medacem dengan mawang niat, iamo' dacem ineh nengacing tot kuanku.

⁵ Bang luk sinierku inan aceh irau temina'. Ugam pangeh bilad kuan sakai. Idi ideh kuman idi ngirup. Denak-denak inan lemulun ngitang, “Lun rayeh baweh! Temina' ku utap muyuh!”

⁶ Idi kebala Tuhan negku,“Amé' iko ngecuk aceh lun nginita, idi ngecuk neneh maré kali' ratnan luk sirenneh.

⁷ Kudeng ieh kali' lemulun luk nalan maya' kuda tedueh-tedueh, idi lemulun luk maya' keladai idi unta, ngecuk neneh nier nedeh do'-do'.”

⁸ Lun luk nginita ineh ngitang, kebalaneh, “O Tuan, ui matar tebaco kedangan.”

⁹ Denak-denak ideh macing! Lemulun luk nalan maya' kuda, tedueh-tedueh. Lun luk nginita ineh maré bala, kebalaneh, “Babil pangeh netabpa! Amung akang luk inandeh sembayang pangeh nebila'.”

¹⁰ O pupuku Israil, muyuh pangeh rinik mepad kudeng padé, iamo' nekini ui pangeh nemada' nemuyuh ratnan bala luk do' luk pindengerku ratnan Tuhan luk Melalud, ieh ineh Allah lun Israil.

Bala Ratnan Bawang Edom

¹¹ Ini bala ratnan Edom. Seburur lemulun nawar negku rat Edom, kebalaneh, “O lun luk nginita, anun kinio dacem ni teh?”

¹² Kebalaku, “Malé macang aco, iamo' inan dacem teh. Kudeng iko sikal ngitun teh, do' lemubed napeh.”

Bala Ratnan Bawang Arab

¹³ Ini bala ratnan bawang Arab. O muyuh lun Dedan, luk megéi' lupo déi' su luk ali-ali bang bawang Arab,

¹⁴ do' maré abpa' rupen lun luk meparing luk amé' nemuyuh. O muyuh lun Tima, do' maré nuba' kuan lun luk buro.

¹⁵ Ngaceku ideh buro pad mepuit ratnan pelapet luk temina' ngaté nedeh, idi binor luk temina' ngelatik nedeh idi amung susa' kareb pebunu' teh.

¹⁶ Idi kebala Tuhan negku, “Selak baruh ubur pupu Kedar miak ugka'.

¹⁷ Lun Kedar luk ngimet binor meluun kuu', iamo' sesuut mo' miak ketecan. Ui ini, Tuhan Allah lun Israil pangeh nepebala.”