YESAYA 20 - BALA LUK DO'

Nabi Luk Lungu

¹ Maya' bala Sargon, raca' Asur, lun rayeh baweh Asur nemunu' bawang Asdod déi' Pilistin.

² Teluh lak luk nepangeh Tuhan nengecuk ni Yesaya Amos nengelengu tacung idi kasutneh. Ieh nemaya' balaNeh idi nelungu.

³ Kareb Asdod pangeh linaya', idi kebala Tuhan, “DemulunKu Yesaya nalan-nalan dengan lungu teluh lak kinioneh. Ini mangun ku tanu' ratnan luk mangun kuan Masir idi Sudan.

⁴ Raca' Asur miak nguit nelun luk tiban dengan lubpa ratnan dueh bawang ineh. Anak adi' idi lun merar miak nalan dengan lubpa pad ngacing igu' kuan Masir.

⁵ Lemulun luk pangeh merapet ku bawang Sudan idi medita' niat ku bawang Masir miak mawa ku tabpa dueh bawang ineh, idi migu'.

⁶ Kareb ineh lemulun luk tudo tangeb abpa' rayeh déi' Pilistin miak pebala, ‘Siruh luk pangeh nangun kuan pupu luk inan tau merapet miak matar netau ratnan raca' Asur! Kudeng apehké tau miak mepuit?’ ”