YESAYA 2 - BALA LUK DO'

Do' Udeng Luk Meruked

¹ Ini bala luk biré Allah ni Yesaya Amos ratnan Yahuda idi Yerusalim.

² Muci aco, pegkung luk su inan Ruma' Allah, meluun dita' ratnan amung-amung pegkung. Mula' pupu amé' su ineh,

³ kebaladeh, “Do' tau mudik pegkung Tuhan, idi amé' Ruma' Allah lun Israil. Tau miak sibada' luk pianNeh kuan tau; idi tau maya' dalan luk pinili'Neh kuan tau.” Bada' Tuhan macing rat Yerusalim; rat Sion Ieh pebala kuan pupuNeh.

⁴ Ieh miak ngagka' kedaluh arang pupu luk rayeh, pad ideh nuno pelapetdeh ku radu, idi busudeh ku iyu. Pupu-pupu na pebunu' peh, idi na temina' ku bunu' teh.

⁵ O inul Yakub, do' tau nalan bang acang luk barén Allah netau!

Dita' Niat Miak Kumin

⁶ O Allah, Iko nenecan pupuMu, ieh ineh inul Yakub. Idi bawangdeh mepanu' ku bangun rat pa busat aco idi rat Pilistin. Ideh maya' adat pupu baken.

⁷ Bawangdeh mepanu' ku pirak idi amas, idi binawehdeh na miak mabud. Inan pelaba' ula' kuda idi keréta pana'.

⁸ Inan akang aput bawangdeh. Idi ideh sembayang nan luk inau' ticu'deh sebuleng.

⁹ Amung-amungdeh miak uen ngigu'. Aleg maré do' nedeh O Tuhan!

¹⁰ Ideh sigapung bang lubang batu luun pegkung. Idi teh ideh ngukat lubang bang tana' pad ideh buro ratnan useh Tuhan, idi sigapung ratnan lalud idi rayehNeh!

¹¹ Muci aco dita' niat lemulun miak ugka', idi sido' niat lemulun uen ngebeneh. Kareb ineh Tuhan sebuleng mo' uen ngerayeh

¹² Kareb ineh Tuhan luk Melalud miak ngebeneh amung lun luk rayeh, idi amung lemulun luk medita' niat.

¹³ Ieh miak nebpeng amung kayuh tumuh luk medita' déi' Lebanon, idi amung kayuh luk meraben déi' Basan.

¹⁴ Ieh miak ngeraked pegkung idi surud luk medita',

¹⁵ idi ngebeneh amung pudut luk medita' idi amung libung batu.

¹⁶ Ieh ngekarem amung kapal luk meluun rayeh idi meluun do'.

¹⁷ Dita' niat idi sido' niat lemulun miak uen ngagka'. Kareb ineh Tuhan sebuleng mo' uen ngedita'.

¹⁸ Idi amung akang pana' na luk idi peh.

¹⁹ Lemulun sigapung bang lubang batu luun pegkung. Idi teh ideh ngukat lubang bang tana', pad ideh buro ratnan useh Tuhan, idi sigapung ratnan lalud idi rayehNeh kareb Ieh macing ngeruyuh tana'.

²⁰ Kareb ineh ideh nala' akang luk inau'deh ratnan amas idi pirak, idi necan nedeh kuan labo idi pawat.

²¹ Kareb Tuhan macing ngeruyuh tana', lemulun sigapung bang lubang batu luun pegkung, pad ideh buro ratnan usehNeh, idi sigapung ratnan lalud idi rayehNeh.

²² Aleg merapet nan lemulun luk maté. Anunké ulekdeh?