YESAYA 19 - BALA LUK DO'

Allah Miak Ngukum Masir

¹ Ini bala ratnan Masir. Tuhan amé' Masir maya' laput. Akang Masir megegker pa kiungNeh, idi lun Masir matot Neneh.

² Kebala Tuhan, “Ui ngacing bunu déi' bawang Masir, pad kinanak sikal metueh ratnan kinanakneh, idi lun luk pamung bawang pebunu' arangdeh sebuleng. Amung bawang Masir pebunu' arangdeh sebuleng teh idi tuda'-tuda' raca' Masir singaro sikal ngimet.

³ Ui miak ngagka' terawé lun Masir idi teh Ui ngelaya' kuu'deh. Ideh miak mutuh pedengan ratnan akangdeh, idi amé' matun nelun luk mangun, idi ngitun roh lun naté pana'.

⁴ Ui maré nelun Masir bang palad lun ngimet luk metueh niat. Aceh raca' luk mekuel miak ngimet nedeh. Ui ini, Tuhan luk Melalud pangeh nepebala.”

⁵ Abpa' Nil amé' isuut, idi iuk-iuk amé' mekeket.

⁶ Abang abpa' dat buen ngaceku amé' mekeket. Idi pisui luk tangeb abpa' miak melayuh,

⁷ idi amung luk tinibu tangeb Abpa' Nil melayuh idi mepalid ku bui.

⁸ Amung lun luk nakap lawid bang Abpa' Nil miak ngarod idi nangi', keluit idi rabetdeh na ulek.

⁹ Lun luk ngebaruh kibung pu na merapet.

¹⁰ Lun luk ngebaruh ineh idi lun baken luk mileh ngakem pelaba dereh idi meberat niat.

¹¹ Amung lun rayeh Soan pelaba bacé, idi lun Masir luk mileh mada' raca' maré bada' luk mebacé. Ngudehké ideh pebala kuan raca', “Kai ini anak lun mileh, idi anak-anak raca' luk mon”?

¹² O raca' Masir, iapehké lun mileh luk mada' namu. Nima' nedeh mada' namu ratnan terawé Tuhan luk Melalud ratnan Masir.

¹³ Lun rayeh Soan idi Mempis mebacé peh. Petulu ideh ngimet bawang. Iamo' ideh nengeraruh neneh.

¹⁴ Tuhan nenima' nedeh maré bada' luk ngagau bawang. Ngaceku ineh Masir megéi' nganau' luk na petulu, idi midar mepad kudeng lun mabuk mekasiad luun uta'neh.

¹⁵ Seburur lun Masir pana' nateh luk miak ngedengan namu rat arang lun do' idi lun dat, lun rayeh idi anak pana'.

Masir Miak Sembayang Nan Tuhan

¹⁶ Kareb ineh lun Masir matot mepad kudeng decur. Ideh megegker ku totdeh kareb ideh kali' Tuhan luk Melalud pangeh nenatang ticu'Neh pad ngukum nedeh.

¹⁷ Lun Masir matot nan bawang Yahuda, anid karebdeh ngerawé ukum luk tinina' Tuhan luk Melalud kuandeh.

¹⁸ Kareb ineh limeh bawang Masir miak pebala bang buri' Kanaan. Lemulun bang bawang ineh pebulung ku ngadan Tuhan luk Melalud. Sebuleng rat arangdeh tetanen, “Bawang Aco.”

¹⁹ Kareb ineh teh, inan bubpun kuan Tuhan bang bawang Masir, idi aceh diri batu mangun ku terawé ratnan Tuhan déi' lakan tana' Masir.

²⁰ Bubpun idi diri ineh mangun ku tanu' ratnan Tuhan luk Melalud idi déi' Masir. Kareb pupu ineh pederen idi nawar mutuh Tuhan ngedengan, Ieh miak ngecuk Lemulun luk Ngulun nedeh.

²¹ Tuhan miak ngegala' bururNeh nelun Masir. Kareb ineh teh ideh miak miti Neneh idi sembayang Neneh idi maré baré luk kereten idi luk sabpen. Ideh miak maré jani' Neneh idi maya' luk ruendeh pejani'.

²² Tuhan ngukum nelun Masir, iamo' pangeh ineh Ieh ngedo' nedeh. Ideh miak lumi Neneh, pad Ieh ninger sembayangdeh idi ngedo' nedeh.

²³ Idi teh, inan aceh dalan arang Masir idi Asur, pad lun Masir idi lun Asur megéi' nalan arang dueh bawang ineh, idi dueh pupu ineh miak sembayang pad-pad.

²⁴ Idi Israil miak mebala dengan Masir idi Asur, idi teluh bawang ineh ngacing peruan kuan uang tana' ini.

²⁵ Tuhan luk Melalud miak ngeperuan nediteluh, kebalaNeh, “O pupuKu, Masir, O Asur luk pinudutKu, O Israil, pupu luk pinili'Ku, Ui ngeperuan nemuyuh.”