YESAYA 18 - BALA LUK DO'

Allah Miak Ngukum Bawang Sudan

¹ Déi' punang amung abpa' Sudan inan bawang su luk inan uni ilad pedingeren.

² Rat bawang ineh tuda'-tuda' lun luk duken maya' rét amé' pa lod. Idi rétdeh inau' ratnan bulu'. O muyuh lun luk duken, muli' muyuh! Do' amé' nated bala kuan bawang muyuh sebuleng déi' punang Abpa' Nil, kuan bawang muyuh luk metueh idi melalud, kuan pupu muyuh luk medita' idi luk kiniki uluh luk inan lun matot aput-aput tana'.

³ O amung muyuh luk tudo bang tana' ini, do' muyuh ninger! Do' nganét aceh bedéra luk uen ngiding luun pegkung! Nganét uni tawak!

⁴ Kebala Tuhan negku, “Ui miak nier rat surga mepad kudeng ipup luk macing dengan na muni, ieh ineh kareb do' aco, kareb ngeranih idi mepad kudeng acang aco kareb mét idang.

⁵ Kareb nateh mureg bua' anggur, kareb amung busakneh merurug idi bua'neh malé melak, bunu' miak ngaté nelun Sudan, mepad kudeng angat anggur tetuin ku iyu.

⁶ Butung lun pebunu'deh miak tacin, pad kenen suit idi pung luk meliput. Suit kuman ineh kareb melau' idi pung kuman kareb meteneb.”

⁷ Kareb ineh, Tuhan luk Melalud miak ngalap baré ratnan bawang ineh luk déi' punang Abpa' Nil, bawang luk metueh idi melalud, pupu luk medita' idi luk kiniki uluh, luk inan lun matot aput-aput tana'. Ideh miak macing nan Pegkung Sion su luk inan lemulun sembayang inan Tuhan luk Melalud.