YESAYA 17 - BALA LUK DO'

Allah Ngukum Damsik Idi Israil

¹ Ini bala ratnan Damsik. Kebala Tuhan, “Damsik na miak mangun ku aceh bawang teh; ieh mangun ku usag mo'.

² Amung bawang Siria miak tacin ruked-ruked. Ideh mangun ku laman dumba idi sapi', idi seburur pana' nateh luk miak ngusu nedeh.

³ Israil na linibung, idi Damsik na tuped sebuleng. Lun Siria mepad kudeng lun Israil luk na miak buren teh. Ui ini Tuhan luk Melalud pangeh nepebala.”

⁴ Kebala Tuhan, “Kareb ineh rayeh Israil miak ugka', idi do'neh uen ngelibal ku asi'.

⁵ Israil mepad kudeng aceh lati' luk pangeh piranih idi ieh dat ali mepad kudeng aceh lati' déi' Repaim luk pangeh piranih teh.

⁶ Pawa' lemulun luk ketecan, idi Israil mepad kudeng saitun; iamo' amung bua'neh pangeh ilap. Dueh kian teluh lek ketecan luun tutu'neh, idi teh apat kian limeh lek ketecan luun angat pa beneh. Ui ini Tuhan Allah lun Israil, pangeh nepebala.”

⁷ Kareb ineh, lemulun miak mutuh pedengan ratnan Lun luk Nemudut nedeh, ieh ineh Allah Israil luk Meligan.

⁸ Ideh na merapet ku bubpun luk inau' ticu'deh sebuleng idi ulung luk inau'deh inan sembayang kuan akang Asera, idi bubpun su luk inandeh ngeseb umau luk do' buen.

⁹ Kareb ineh bawang luk linibung idi meraben miak tacin idi uen ngusag mepad kudeng bawang lun Hiwi idi lun Amori pangeh tican kareb ideh neburo rat nelun Israil.

¹⁰ O Israil, iko pangeh nekelupan Allah luk muit namu, idi luk ngelibung namu mepad kudeng batu luk meraben. Iamo' iko nganau' kabun su luk inan sembayang inan allah pupu baken.

¹¹ Iamo' sagan pana' tibu ineh mulun idi kebusak kareb iko nibu nedeh pa pekak, na tu luk perinien. Iamo' inan susa' mo' idi ét luk na miak do'.

Bawang Luk Munu' Uen Ngelaya'

¹² Pupu luk rayeh uned meria' dengan arod luk mepad kudeng beri abpa' rayeh, kareb mula' ribut.

¹³ Amung pupu macing mepad kudeng ribut luk rayeh, iamo' Allah mada' nedeh pad ideh lemubed. Ideh mepalid mepad kudeng abuh luun pegkung, idi lipang bang libuleh.

¹⁴ Ideh ngatot kareb macep aco, iamo' pa pekak ideh na idi! Kudeng ineh kekiped amung lemulun luk ngaro bawang tau.