YESAYA 16 - BALA LUK DO'

Lun Luk Buro Rat Moab Amé' Yahuda

¹ Rat bawang Séla déi' su luk ali-ali, lun Moab maré aceh anak dumba ku baré kuan lemulun luk ngimet Yerusalim.

² Ideh nganét tangeb Abpa' Arnon, idi nalan mo'-mo', mepad kudeng suit luk inusu ratnan arardeh.

³ Kebaladeh nelun Yahuda, “Mada' nekai ratnan luk ruen kai. Matar nekai, mepad kudeng kayuh luk ngelungung kareb mét idang muned aco, idi nima' nekai ngato erur kai liang lungungmu. Kai ini lun luk buro. Ngapung nekai su luk inan na kali' lemulun.

⁴ Nima' nekai tudo bang bawangmu. Matar nekai ratnan lun luk sikal ngusag nekai.” (Dereh idi usag miak mabud, idi lemulun luk ngusag bawang na luk idi peh.

⁵ Idi seburur rat arang inul Daud miak mangun ku raca', idi Ieh miak ngimet pupu dengan mesiri idi mawa. Ieh mesaget nganau' luk matu, idi Ieh miak ngacing luk mesiri.)

⁶ Kebala lun Yahuda, “Kai pangeh neninger ratnan dita' niat lun Moab. Kai kali' ideh mesido' niat idi nengadan, iamo' na ulek baladeh.”

⁷ Lun Moab miak nangi' ngaceku derehdeh. Ideh miak nangi' kareb ideh ngerawé akan luk do' luk kinandeh déi' bawang Kir Heris. Ideh pelaba susa' niat.

⁸ Amung lati' muneng ku Hesbon idi kabun anggur déi' Sibma inusag. Abpa' anggur ratnan kabun ineh luk nengabuk raca'-raca' amung pupu atun. Mon anggur ineh maput pa busat aco macing bawang Yaser idi su luk ali-ali, idi pa acep aco Abpa' luk Mepaci'.

⁹ Nekini Ui nangi' ngaceku anggur Sibma idi bawang Yaser. Idi teh abpa' matehKu mebpeh ngaceku Hesbon idi Eliala, ngaceku na luk perinien luk ku ngawang niat lemulun.

¹⁰ Seburur pana' nateh luk mawang niat luun lati' luk mebaleng. Seburur pana' nateh luk ngitang idi menani bang kabun anggur. Seburur pana' nateh luk ngeradu' anggur pad ngalap abpa'neh. Awang niat idi do' ria' pangeh ugka'.

¹¹ Ui ngarod ku susa' niat ngaceku Moab idi Kir Heris.

¹² Lun Moab merur nalan mudik pegkung pad sembayang bang ruma' akang idi su luk inandeh sembayang. Iamo' na ulekneh. (

¹³ Ini bala luk biré Tuhan atun ratnan Moab.

¹⁴ Idi nekini Tuhan pebala, “Teluh lak baruh binaweh Moab luk pelaba ula' na idi. Pawa' lemulun miak mulun rat arang pupu ineh luk pelaba ula, idi ideh pana' melaya' peh.”)