YESAYA 15 - BALA LUK DO'

Allah Miak Ngusag Moab

¹ Ini bala ratnan Moab. Bang sedacem bawang Ar idi Kir inusag, idi ali-ali aput bawang Moab.

² Lun Dibon mudik surud amé' nangi' déi' su luk inandeh sembayang. Lun Moab temido ku susa' niatdeh ngaceku bawang Nebo idi Mediba. Ideh pangeh nengiki uluhdeh idi nemingit buluh tangdeh ngaceku susa'deh.

³ Lemulun luk maya' dalan nacung. Déi' luun natad bawang idi luun apo ruma'deh luk mebalad ideh temido idi nangi'.

⁴ Lun Hesbon idi lun Eliala ngitang, idi aroddeh pedingeren pad macing Yahas. Lun pebunu' pana' megegker idi na mekuu'.

⁵ Ui pana' nangi' ngerawé Moab! Lun bang bawang ineh pangeh neburo iné' Soar. Sebuang mudik dalan amé' Luhit, dengan nangi'. Sebuang buro amé' Horonaim dengan ngarod ku dat niatdeh.

⁶ Arur Nimrim mekeket, idi uduh luk tangeb abpa' nelayuh, sesuut pana' nateh luk mebata'.

⁷ Lemulun nalan lemaba Raked Bulu', nakap dalan buro dengan binawehdeh.

⁸ Aput bawang Moab inan tangi'. Tangi' ineh pedingeren rat Eglaim idi Bir Elim.

⁹ Déi' Dibon abpa' mesia' ku dara'. Idi inan luk meluun dat tinina' Allah kuan lemulun luk tudo su ineh. Matu, amung lemulun luk ketecan déi' Moab miak pitayen.