YESAYA 14 - BALA LUK DO'

Lun Israil Muli' Ratnan Bawang Luk Inandeh Tiban

¹ Tuhan méi' nelun Israil sekua' teh, pad Ieh mili' nedeh ku pupuNeh teh idi nima' nedeh lemubed amé' tudo bang bawangdeh sebuleng, idi lun pupu baken pana' miak amé' tudo dengandeh.

² Mula' pupu baken miak ngedengan nelun Israil, kareb ideh lemubed amé' bang bawang luk biré Tuhan nedeh, idi su ineh pupu baken miak ngakem kuan Israil mepad kudeng demulun. Lemulun luk nenaban Israil atun miak tebanen Israil. Idi lun Israil miak ngimet nelun luk nengedereh nedeh atun.

Raca' Babil Bang Su Luk Inan Até

³ Tuhan miak ngedo' nelun Israil ratnan ét idi derehdeh, idi ratnan kekamen lun luk tiban luk pelaba berat.

⁴ Kareb Tuhan nganau' kudeng ini, ideh miak situnga inan raca' Babil, kebaladeh: “Raca' luk mekuel pangeh nebpeh! Seburur pana' nateh luk miak pederenneh teh!

⁵ Tuhan pangeh nengagka' lalud raca'-raca' luk dat

⁶ luk dengan usehdeh nengedereh amung pupu, idi luk na nugka' ngedereh pupu luk linaya'deh.

⁷ Nekini inan do' udeng idi awang aput tana', idi amung lemulun menani mawang niat.

⁸ Kayuh tongor idi tumuh Lebanon mawang niat ku ebpeh raca', ngaceku na lun luk nebpeng nedeh, ngaceku raca' ineh na idi!

⁹ “Su luk inan até netemina' ngalap raca' Babil. Roh lemulun luk inan lalud bang tana' ini sigio su ineh. Roh raca'-raca' tumui rat luun kerusideh.

¹⁰ Ideh nawar neneh, kebaladeh, ‘Nekini iko mepad laya' kudeng kai. Iko mepad kudeng kai teh!

¹¹ Atun iko buren dengan uni gita, iamo' nekini iko idi bang su luk inan até. Iko telubid luun ugam luk inan uled, idi tarubmu ineh kelati.’

¹² “Pelaba bura' ebpehmu rat déi' langit, O gituen pekak luk merasat. Nekini iko tila' luun tana', iko luk nengedereh amung pupu!

¹³ Kebalamu bang niatmu, ‘Ui amé' déi' surga; Ui miak ngeletep kerusi meluun dita' ratnan gituen Allah. Ui miak tudo luun pegkung pa tinueh busat aco su luk inan amung allah mepamung.

¹⁴ Ui amé' meluun dita' ratnan laput. Ui nganau' bururku mepad kudeng Luk Meluun Dita'.’

¹⁵ Iamo' iko inau' mebeneh macing bang su luk inan até, ieh ineh bang lubang luk pelaba dalem.

¹⁶ “Lun naté miak nutong idi mawa nier namu. Kebaladeh, ‘Kudeng iniké lemulun luk nengeruyuh tana' idi luk nengatot amung bawang?

¹⁷ Kudeng iniké lemulun luk nengusag bawang idi luk nengisu' tana' mangun ku su luk ali-ali? Kudeng iniké lemulun luk na tu nemuit nelun luk tibanneh idi na nemaré nedeh muli'?

¹⁸ Amung raca' tana' telubid bang tanemdeh luk pelaba do',

¹⁹ iamo' iko na tanem, idi butungmu talan bang lubang pad melu idi uen lun ngeradu'. Idi butung lemulun luk pinaté bang bunu' talan pa luunmu.

²⁰ Na iko tinamen kudeng raca' baken, ngaceku iko nengusag bawangmu, idi nengaté pupumu sebuleng. Seburur pana' rat bang tetek ruma'mu nateh luk miak mulun.

²¹ Ngimun ngaté anak-anak raca' ini. Ideh miak maté ngaceku sala' tepundeh. Seburur pana' rat arangdeh nateh luk miak ngimet mangun ku raca' bang tana' ini idi mudut mula' bawang rayeh.”

Allah Miak Ngusag Babil

²² Kebala Tuhan luk Melalud, “Ui ngerieng Babil idi ngusag neneh. Ui na necan anun-anun — anak pana' nateh. Seburur pana' nateh luk miak mulun. Ui ini Tuhan pangeh nepebala.

²³ Ui ngisu' Babil mangun ku tana' payeh idi puek miak mulun su ineh. Ui miak ngapuh Babil ku apuh pad na luk ketecan. Ui ini Tuhan luk Melalud pangeh nepebala.”

Allah Miak Ngaté Nelun Asur

²⁴ Tuhan luk Melalud pangeh nepebulung, “Luk pangeh litepKu miak mangun, idi luk tirawéKu miak ruenKu.

²⁵ Ui miak ngaté nelun Asur bang bawangKu Israil, idi ngeradu' nedeh luun pegkungKu. Ui muit pupuKu ratnan paga Asur, idi teh ratnan luk babendeh.

²⁶ Ini luk teruayenKu kuan tana'. Idi ticu'Ku tutang miak ngukum amung pupu.”

²⁷ Tuhan luk Melalud na miak na nganau' amung ineh. Ieh pangeh nenatang ticu'Neh pad ngukum, idi seburur pana' nateh luk miak ngagka' Neneh.

Allah Miak Ngaté Nelun Pilistin

²⁸ Ini bala luk pangeh bila bang lak luk inan Raca' Akas naté.

²⁹ O lun Pilistin, rukud luk nemebal nemuyuh neputul, iamo' na muyuh miak mawang niat. Kareb sebuleng menipeh maté, inan sebuleng luk meluun dat ngelibal neneh. Kareb menipeh nutuk terurneh galau luk temulud remuat!

³⁰ Tuhan mangun ku lun matar nelun masi' arang pupuNeh, pad ideh do' udeng. Iamo' Ieh maré kuan muyuh lun Pilistin aceh iru' luk pelaba io pad seburur pana' rat arang muyuh nateh luk mulun.

³¹ Ngitang idi mutuh pedengan, O amung bawang Pilistin! O amung bawang, do' muyuh matot! Ngaceku rabpun macing rat pa tinueh busat aco — ieh ineh aceh baweh luk mekuu'.

³² Kudeng apehké tau ngor bala lun luk duken amé' netau rat Pilistin? Tau mada' nedeh ratnan Tuhan luk pangeh nengeletep, Sion, pad pupuNeh luk medereh miak do' udeng su ineh.