YESAYA 13 - BALA LUK DO'

Allah Miak ngukum Babil

¹ Ini bala ratnan Babil luk ilap Yesaya anak Amos ratnan Allah.

² Do' naped bedéra pebunu' luun surud luk na tupu kayuh! Idi ngitang kuan lun pebunu' idi ngiding ticu'mu mangun ku tanu' kuandeh, pelé ideh ngerieng munung tanga' bawang luk medita' niat ineh.

³ Tuhan pangeh nenawar lun pebunu'Neh luk mekuu' idi mesangit, pelé ideh nganau' aceh bunu' luk meligan, pad ngukum lemulun luk inanNeh museh.

⁴ Ninger muyuh! Inan luk muni luun pegkung — mepad kudeng ria' lemulun luk mula', ieh ineh ria' mula' pupu idi imet luk mepamung. Tuhan amung baweh nganau' lun pebunu'Neh temina'.

⁵ Ideh macing rat bawang luk mado luk iring tana'. Dengan usehNeh Tuhan macing pian ngusag aput bawang Babil.

⁶ O Babil, ngarod ku étmu! Aco Tuhan muneng peh, ieh ineh aco luk inan Tuhan luk Melalud ngusag namu!

⁷ Kareb ineh amung ticu' melaya', idi na kuu'deh peh.

⁸ Ideh pelaba tot, idi mét pana', mepad kudeng decur luk mét nenganak. Ideh pesier idi migu'.

⁹ Aco Tuhan macing, ieh ineh aco usehNeh. Tana' mangun ku su luk ali-ali idi amung lun mesala' miak maté.

¹⁰ Amung gituen na macang, kareb aco masat na inan acang, idi bulan pana' na maré acang teh.

¹¹ Kebala Tuhan, “Ui ngacing susa' kuan tana' idi ngukum lemulun luk dat ngaceku sala'deh. Ui ngebeneh lemulun luk medita' niat idi ngukum lemulun luk mesido niat idi lemulun luk mekuel,

¹² pad lemulun pawa' mepad kudeng amas rat Opir.

¹³ Ui miak ngegio langit, idi tana' uen ngeruyuh rat su luk inanneh, kareb Ui ini Tuhan luk Melalud ngegala' usehKu.

¹⁴ “Pupu baken luk tudo déi' Babil miak buro muli'. Ideh urap mepad kudeng payo luk buro kareb lun nganup idi dumba luk na lun matar.

¹⁵ Idé-idé luk kamendeh miak tebaken macing maté.

¹⁶ Idi anakdeh pana' bebaten macing maté, ruma'deh uen ngaro idi awandeh inan lun pasét, kareb ideh lingo-lingo ku laya'deh.”

¹⁷ Kebala Tuhan, “Ui ngegio nelun Midi pad ideh ngerieng Babil. Ideh na pian ku pirak idi amas.

¹⁸ Ideh miak ngaté anak adi' ku binordeh. Na ideh méi' nan anak isuut idi anak dari pana'.

¹⁹ Babil ineh meluun taga ratnan amung bawang baken, idi pupuneh megéi' ngubur neneh. Iamo' Ui ini Tuhan miak ngelaya' Babil, mepad kudeng luk inau'Ku kuan Sodom idi Gemora!

²⁰ Seburur lemulun pana' nateh luk tudo su ineh baruh. Lun Arab luk lawé-lawé na lupo su ineh, idi lun luk matar dumba pana' na nakap uduh su ineh teh.

²¹ Babil mangun ku su luk inan pung rat su luk ali-ali tudo, idi su luk inan puek nganau' arardeh. Suit luk necan terurdeh miak tudo su ineh, idi amék luk meliput miak nalan luun usagneh.

²² Pudut luk medita' idi ruma'-ruma' raca' pana' melinguh ku arod bungalé idi ribuan. Tarék Babil pangeh nacing! Ulunneh malé mabud.”