YESAYA 11 - BALA LUK DO'

Imet Luk Na Inan Susa'

¹ Inul Raca' Daud mepad kudeng aceh Iawa kayuh luk pangeh tibpeng; iamo' tuedneh miak nginulih. Kudeng ineh teh aceh raca' luk mebaruh miak tumui rat arang inul Daud.

² Roh Tuhan miak tudo luunNeh, Ieh ineh Roh ileh idi do' kali', Roh imet idi lalud, Roh ngiti idi matot nan Tuhan.

³ Ieh mawang niat maya' pian Tuhan. Ieh na mutut ukum maya' luk siren mateh, idi luk pedingeren lalid.

⁴ Ieh mutut ukum luk mesiri kuan lun masi', idi maré luk petulu kuandeh. Maya' balaNeh bawang ineh miak kumin, idi lemulun luk dat miak maté.

⁵ Ieh ngimet pupuNeh dengan mesiri idi matu.

⁶ Bungalé idi dumba miak pamung dengan do', kuir miak telubid dengan anak amék, anak sapi' idi anak balang pad-pad kuman, idi anak dari miak maman nedeh.

⁷ Sapi' idi beruang pana' miak pad-pad kuman, idi anakdeh pad-pad telubid dengan do'. Balang miak kuman uduh luk tekering, mepad kudeng sapi'.

⁸ Anak isuut pana' na tiduken, kudeng ieh marot iring seruang.

⁹ Luun Sion, ieh ineh pegkung Allah luk meligan, na luk ngurat idi luk dat. Tana' ini miak panu' ku ileh ratnan Tuhan, mepad kudeng abpa' rayeh panu' ku abpa'.

Pupu Luk Tiban Muli'

¹⁰ Kareb ineh raca' luk mebaruh ratnan inul Daud ineh mangun ku tanu' kuan amung pupu. Ideh miak mepamung bang bawang raca' idi maré ubur Neneh.

¹¹ Kareb ineh teh, Tuhan ngegala' laludNeh sekua' teh, idi nguit muli' pupuNeh luk ketecan déi' Asur, Masir, Patros, Sudan, Elam, Babil, Hamat, bawang luk tangeb abpa' rayeh, idi pulau-pulau pana'.

¹² Ieh miak naped aceh bedéra kuan amung pupu, idi Ieh miak ngamung nelun Israil luk pangeh tiban idi lun Yahuda luk pangeh pitad, rat iring tana'.

¹³ Imet Israil na temaruh nan Yahuda teh, idi Yahuda na sikal metueh ratnan Israil.

¹⁴ Ideh pamung ngerieng nelun Pilistin luk pa acep aco idi ngaro binaweh pupu luk tudo pa busat aco. Ideh miak metueh rat nelun Edom idi Moab, idi lun Amon pana' miak maya' nedeh.

¹⁵ Tuhan miak ngacing bui luk melau' luk ngekeket Abpa' Nil idi Abpa' Pirat, pad inan tudu' arur luk isuut mo' ketecan luk miak gitan idé-idé pana'.

¹⁶ Kareb ineh inan aceh dalan rat Asur kuan pupuNeh lun Israil luk mulun su ineh teh, mepad kudeng luk inau'Neh kuan tepundeh kareb ideh nenalan rat Masir.