YESAYA 10 - BALA LUK DO'

¹ Muyuh miak kumin! Muyuh nganau' ukum luk ngedereh pupuKu,

² idi mebpeng nelun masi' na ngalap luk petulu. Idi bang besara', muyuh mutut ukum luk na mesiri kuandeh. Kudeng ineh lawé muyuh ngaro binaweh decur tinula' idi anak maté.

³ Anunké luk ruen muyuh kareb Allah ngukum nemuyuh? Anunké luk ruen muyuh kareb Ieh ngacing susa' kuan muyuh rat bawang luk mado? Amé' mutuh pedengan nidé muyuh? Iapeh inan muyuh ngapung binaweh muyuh?

⁴ Muyuh miak pitayen bang bunu', kian tebanen lek. Iamo' useh Tuhan na ugka', idi ticu'Neh tutang pian ngukum.

Raca' Asur Bang Imet Allah

⁵ Kebala Tuhan, “Mesusa' kuan Asur! Ui makai Asur kudeng paper, pelé necat lemulun luk inanKu museh.

⁶ Ui nengecuk Asur ngerieng aceh pupu luk na manu idi luk ngegio usehKu. Ui nengecuk nedeh ngaro, mano, idi ngeradu' lemulun luun dalan.”

⁷ Iamo' raca' Asur inan terawéneh sebuleng luk pelaba dat. Terawéneh lutep pian ngusag mula' bawang.

⁸ Ieh nengadan, kebalaneh, “Amung lun rayeh bawehku mepad kudeng raca'!

⁹ Ui luk nengelaya' bawang Kalno idi Karkemis! Ui luk nengelaya' bawang Hamat idi Arpad! Ui luk nengelaya' bawang Samaria idi Damsik!

¹⁰ Ui nenatang ticu'ku pelé ui ngukum amung imet luk sembayang inan akang luk meluun ula' ratnan akang Yerusalim idi Samaria.

¹¹ Ui pangeh nengusag Samaria idi amung akangneh, idi ui miak ngusag Yerusalim idi amung akang luk inandeh sembayang su ineh.”

¹² Iamo' kebala Tuhan, “Kareb Ui mangeh kekamenKu luun Pegkung Sion idi déi' Yerusalim, idi Ui miak ngukum raca' Asur, ngaceku ieh nengadan ku dita' niatneh.”

¹³ Raca' Asur nengadan, kebalaneh, “Ui nenganau' amung ineh. Ui pelaba tueh, idi pelaba ileh. Ui nenala' amung lakan tana' arang tuda'-tuda' bawang idi nengaro binaweh luk dinugdeh. Ui nengeradu' pupu luk tudo su ineh mepad kudeng aceh sapi' deléi.

¹⁴ Amung pupu bang tana' ini mepad kudeng arar suit, idi ui nengalap binawehdeh mepad kudeng ngalap terur. Sebuleng ilad pana' nateh nesigio pian ngatot negku; sebuleng ticuk pana' nateh nukab idi muni!”

¹⁵ Iamo' kebala Tuhan, “Miakké uai pebala ieh meluun rayeh ratnan lemulun luk makai neneh? Inanké radi' meluun rayeh ratnan lemulun luk ngeradi' ku ineh? Paper na mabeh lemulun, iamo' lemulun mabeh paper.”

¹⁶ Tuhan luk Melalud pian ngacing ét pelé ngukum lemulun luk pelaba bor nekini.

¹⁷ Aceh apui miak mulun bang bururdeh kidi-kidi. Allah Israil luk meligan miak mangun ku budung apui luk ngeseb luk amung-amung bang seaco mo', dengan kayuh luk metabpa' idi bitarung pana'.

¹⁸ Pulung kara idi lati' luk mebaleng miak uen ngusag, mepad kudeng lemulun luk maté ku ét luk mebura'.

¹⁹ Kayuh luk ketecan pelaba asi' pad amung ineh mekiap anak.

Pawa' Lun Luk Lemubed

²⁰ Bang aco sineh lun Israil luk neketecan na miak merapet inan aceh pupu luk lélé ngusag nedeh. Ideh miak merapet tu-tu inan Tuhan, Allah Israil luk meligan.

²¹ Sesuut mo' lun Israil miak lumi inan Allahdeh luk melalud.

²² Sagan pana' kinula' lun Israil nekini mepad kudeng bada luk tangeb abpa', sesuut mo' miak lemubed. Usag pangeh netemina' kuan pupu ineh, idi usag ineh petulu kuandeh.

²³ Matu, aput bawang ineh Tuhan luk Melalud miak ngacing usag maya' kudeng luk bilaNeh.

Tuhan Miak Ngukum Asur

²⁴ Kebala Tuhan luk Melalud inan pupuNeh luk tudo déi' Sion, “Aleg matot nelun Asur, sagan pana' ideh ngedereh nemuyuh mepad kudeng luk inau' Masir mon.

²⁵ Na mio teh Ui ugka' ngukum nemuyuh, pelé Ui ngusag nedeh.

²⁶ Ui ini Tuhan luk Melalud miak mebal nedeh mepad kudeng Ui nemebal nelun Midian déi' batu Oreb. Ui miak ngedereh Asur, mepad kudeng Ui nengedereh Masir.

²⁷ Kareb ineh Ui muit nemuyuh ratnan lalud Asur, idi paga'deh na miak ngesabeng nemuyuh teh.”

Bunu' Luk Ngerieng

²⁸ Bunu' pangeh nacing bawang Ai! Ideh nelemaba Migron! Ideh nenecan binawehdeh déi' Mikmas.

²⁹ Ideh nelemaba ruan idi rudap déi' Giba! Lun bang bawang Rama pelaba tot, idi lun bang bawang Gibia, ieh ineh bawang Raca' Saul pangeh neburo.

³⁰ Do' ngitang, O pupu Galim! Ninger, O pupu Lais! Do' ngua', O pupu Anatot!

³¹ Lun Madmina idi lun Gebim buro amé' mado.

³² Aco sini bunu' idi déi' bawang Nob, idi su ineh ideh nguma' Pegkung Sion idi bawang Yerusalim.

³³ Tuhan luk Melalud miak nutu' nedeh, mepad kudeng angat kayuh luk tetuin. Idi lun luk meluun dita' niat idi meluun sido' niat arangdeh miak tetuin idi uen ngigu'.

³⁴ Tuhan miak nebpeng nedeh mepad kudeng kayuh bang pulung kara tebangen ku uai, idi teh mepad kudeng kayuh luk meluun do' déi' Lebanon meluka'!