YESAYA 1 - BALA LUK DO'

¹ Bang surat ini inan bala luk ginala' Allah ratnan Yahuda idi Yerusalim kuan Yesaya Amos, bang kareb Usia, Yotam, Akas, idi Hesekia mangun ku raca' Yahuda.

Allah Mada' PupuNeh

² Kebala Tuhan, “O tana' idi langit, ninger balaKu! Kudeng ini bala Tuhan! Anak-anak luk isa'Ku sikal metueh rat Negku.

³ Sapi' kali' lemulun luk kuan nedeh, idi keladai kali' su luk inan tuandeh maman nedeh. Iamo' ideh meluun ileh ratnan pupuKu lun Israil. Ideh na kali' anun-anun.”

⁴ O pupu luk mesala'. O muyuh luk dat idi tekilu', muyuh miak kumin! Sala' muyuh ngeraruh nemuyuh! Muyuh pangeh nenecan Tuhan Allah lun Israil luk meligan, idi muyuh neteketed rat Neneh.

⁵ Ngudehké muyuh sikal metueh rat Negku? Pianké muyuh kumin teh? O Israil, uluhmu muput ku urat, niat idi terawému pana' mét.

⁶ Aput bururmu inan luk mét, ieh ineh luk merirem, kimuh, idi urat luk medara' teh. Amung uratmu ineh nateh biru' idi inabet. Idi teh na ubat inau' luundeh.

⁷ Tana'mu pangeh inusag idi amung-amung bawangmu nabud iseb. Laba' iko nier, pupu baken ngaro tana'mu idi ngusag luk amung-amung.

⁸ Yerusalim sebuleng mo' ketecan, ieh ineh aceh bawang luk uen ngerieng — mepad laya' kudeng lepo lun luk matar kabung anggur idi lepo luk bang kabun timun.

⁹ Kudeng Tuhan luk Melalud na nima' sebuang lemulun mulun, kali' rungen Yerusalim nabud inusag, mepad kudeng Sodom idi Gemora.

¹⁰ O Yerusalim, raca'mu idi pupumu mepad kudeng lun Sodom idi Gemora. Ninger bala Tuhan nemuyuh, idi maya' bada' Allah tau.

¹¹ KebalaNeh, “Anunké ulek amung baré luk barén muyuh Negku? Ui musam ku baré dumba luk sabpen idi lemak aya' muyuh luk meluun do'. Ui musam ku dara' sapi', dumba, idi amék pana'.

¹² Idéké nengecuk nemuyuh nguit amung ineh kareb muyuh amé' sembayang Negku. Idéké nengecuk nemuyuh nalan-nalan bang ruma'Ku?

¹³ Na Ui pian ku baré muyuh luk na ulek. Ui megateh ku buen umau luk sabpen muyuh. Ui ara' ku Irau Bulan Baruh, idi Aco luk inan muyuh Mudeng, idi teh tebubpun muyuh pana'. Amung ineh na ulekneh ngaceku sala' muyuh.

¹⁴ Ui megateh ku Irau Bulan Baruh idi Aco Rayeh muyuh. Amung ineh mangun ku babeh luk meberat kuanKu.

¹⁵ “Kareb muyuh sembayang idi ngiding ticu' muyuh Ui na sikal nier nemuyuh. Sagan tu pana' muyuh mekadang sembayang, Ui na sikal ninger ngaceku ticu' muyuh melutak ku dara'.

¹⁶ Do' muyuh sibaru'. Ugka' ratnan amung kekamen luk dat luk kali'Ku. Matu, do' muyuh ugka' ratnan nganau' luk dat,

¹⁷ idi sibada' nganau' luk do'. Megéi' mutut luk mesiri. Ngedengan lemulun luk pidereh. Ngedengan anak maté idi decur tinula'.”

¹⁸ Idi teh kebala Tuhan, “Nekini do' tau mutut gayam ini. Sagan pana' muyuh mesia' ku sala' muyuh, Ui sikal maru' nemuyuh, pad muyuh mebuda' kudeng salju. Sagan pana' sala' muyuh sia' merirem muyuh mangun mebuda' kudeng buluh dumba.

¹⁹ Kudeng muyuh sikal maya' balaKu, muyuh miak kuman uli' tana' ini luk do'.

²⁰ Iamo' kudeng muyuh ara' maya' balaKu idi sikal metueh rat Negku, muyuh miak kumin maté. Ui ini Tuhan pangeh nepebala.”

Bawang Rayeh Luk Mesala'

²¹ Bawang luk lutep maya' Negku atun pangeh mangun ku decur luk mesawa'! Mon lun luk matu tudo su ineh, iamo' nekini lun luk ngaté mo' luk ketecan.

²² O Yerusalim, atun iko mepad kudeng pirak, iamo' nekini na ulekmu. Atun iko mepad kudeng abpa' anggur luk do', iamo' nekini iko mangun ku abpa' talang.

²³ Lun rayeh muyuh sikal metueh idi perurum nelun mano. Ideh megéi' ngalap baré idi suap. Iamo' na ideh ngedengan anak maté idi decur tinula' bang besara'deh.

²⁴ Ngaceku ineh kebala Tuhan amung baweh, ieh ineh Allah Israil luk Melalud: “O bunu'Ku, Ui ngua' nemuyuh pad muyuh na ngesusa' Negku.

²⁵ Ui sikal necat nemuyuh. Ui sikal ngeligan nemuyuh mepad kudeng pirak uen ngeligan, idi nala' amung lutak muyuh.

²⁶ Ui sikal maré lun ngimet nemuyuh idi lun luk mada' mepad kudeng lun rayeh muyuh mon. Idi Yerusalim miak tetanen bawang luk lutep maya' bala idi matu.”

²⁷ Ngaceku Tuhan ineh matu, Ieh miak ngulun Yerusalim idi amung lemulun luk uren luk tudo su ineh.

²⁸ Iamo' Ieh miak ngukum amung lemulun luk nganau' sala' idi luk sikal metueh rat Neneh. Idi teh Ieh ngaté amung lemulun luk necan Neneh.

²⁹ Muyuh miak nginuud ratnan sembayang nan lawa kayuh idi ratnan nganau' kabun su luk inan muyuh sembayang.

³⁰ Muyuh miak melayuh mepad kudeng kayuh luk maté, idi kabun luk na uen mubpur.

³¹ Mepad kudeng kayuh luk tekering mebareh ku apui, kudeng ineh teh lun luk rayeh miak maté ku kekamendeh luk dat, idi seburu pana' nateh luk miak ngagka' até ineh.